4 tamyz kúni Tájikstan Respýblikasy Qorǵanysqa járdemdesý qoǵamdyq uiymynyń «An-2» oqý-jattyǵý ushaǵy qulady. Saldarynan bir adam ajal qushyp, taǵy bireýi aýrýhanaǵa jetkizildi. Bul týraly Qoǵamdyq uiymnyń baspasóz ortalyǵyna silteme jasap Hovar agenttigi habarlady.
1978 jyly shyǵarylǵan ushaq Tájikstan Qorǵanys ministrliginiń «Fahrabad» oqý-jattyǵý poligonynda josparly ushýlardy oryndaý kezinde tehnikalyq sebepterge bailanysty apatqa ushyraǵan.
68 jastaǵy ushqysh Horasan aýdandyq aýrýhanasyna jeter-jetpes jolda kóz jumǵan. 28 jastaǵy ekinshi pilot sol aýrýhanada jatyr.
Qazir atalmysh eldiń Memlekettik ulttyq qaýipsizdik komiteti apatqa qatysty qylmystyq is qozǵady. Tergeý amaldary júrip jatyr.
