Atyraý oblysynda ákimdik esepshisi 18,4 mln teńgeni jymqyrǵan, dep habarlaidy QazAqparat.
Atyraý oblystyq tekserý komissiiasynyń múshesi Aslan Qumarovtyń málimetine súiensek, byltyr ýákiletti organdarǵa shara alý úshin joldanǵan aýdit materialdary negizinde 256 ákimshilik is qozǵalǵan. Sonyń nátijesinde 120 jeke jáne zańdy tulǵaǵa 16 mln teńgeniń ákimshilik aiyppuly salynǵan. Tekserý qorytyndysymen 138 laýazymdy tulǵa tártiptik jaýapkershilikke tartylǵan.
«Qyzylqoǵa aýdanyndaǵy Muqyr aýyldyq okrýgi ákimi apparatynyń esepshisi qyzmetkerlerdiń atynan ózine tiesili esepshotqa 18,4 mln teńgeni aýdaryp jibergen. Sondai-aq, Maqat aýdandyq mádeniet, tilderdi damytý, dene shynyqtyrý jáne sport bóliminiń esepshisi sporttyq is-shara men issaparlarǵa bólingen qarjyny dáleldi qujattarsyz, tiisti buiryqta kórsetilgen somadan artyq kólemde aýdarǵan. Zańsyz aýdarylǵan qarjynyń kólemi 2,6 mln teńgeni qurady. Atyraý qalasyndaǵy №26 «Juldyz» balabaqshasynyń esepshisi 25,6 mln teńgeni quraǵan biýdjet qarajatyn óziniń jáne týysqandarynyń banktegi kartasyna aýdaryp alǵan. Sot sheshimimen kinálilerge bas bostandyǵyn shekteý jazasy taǵaiyndaldy», - deidi Aslan Qumarov.
Onyń aitýynsha, byltyr 31 melekettik, 52 kvazimemlekettik sektor nysandarynda tekserý júrgizilgen. Zańnamasyn saqtamaý sebebinen anyqtalǵan buzýshylyqtardyń jalpy somasy 2 mlrd teńgeni quraidy. Onyń ishinde qarjylyq buzýshylyqtar – 742 mln teńge. Biýdjettiń 423 mln teńgesi tiimsiz jumsalǵan. Al tiimsiz josparlanǵan biýdjet qarajatynyń somasy 1 mlrd teńgege jetken.
