Atyraý oblysyna Reseiden 100-den astam kólik jalǵan qujatpen ákelingen, dep habarlaidy QazAqparat.
Oblystyq politsiia departamenti bastyǵynyń birinshi orynbasary, politsiia polkovnigi Berik Amangeldiniń aitýynsha, Reseiden ákelingen kólik qujatynyń 3 kólikke tiesili ekeni anyqtalǵan.
«Atyraý oblysynyń aýmaǵynda 8 qarashada «Qaýipsiz jol» jedel-profilaktikalyq is-sharasy bastaldy. Patrýldik politsiiasy qyzmetkerleri is-sharanyń alǵashqy kúni saǵat 17:00 shamasynda «Aqtaý-Atyraý» tas jolynda jyldamdyqty shamadan tys asyrǵany úshin Reseide tirkelgen «Toyota Ipsum» markaly avtokóligin toqtatty. Avtokóliktiń qujattaryn tekserý kezinde tirkeý belgisi men markasy sáikes kelmeitini anyqtaldy. Kóliktegi memlekettik belgi «Nissan Fuga» jáne «Maz» avtokólikterine de tirkelgeni belgili boldy. Qazir atalǵan derekke qatysty QR Qylmystyq kodekstiń 386-babynyń 1-bóligimen qylmystyq is qoǵaldy» - deidi Berik Amangeldi.
Onyń aitýynsha, oblys aýmaǵyna Reseiden jalǵan tirkeý nómirimen jáne qujatpen ákelingen 100-den astam avtokólik anyqtalǵan.
«Mundai kólikterdi satyp alǵan adamdar Reseide tirkeýde tur dep oilaidy. Eger ol senimhatpen nemese saqtandyrý polisi negizinde satylsa, iesi kólik salyǵyn tólemeý úshin kez kelgen ýaqytta odan bas tartady. Al, qazaqstandyq júrgizýshi jol apatyna tússe, saqtandyrý tólemin ala almaidy. Sol sebepten, shetelderde tirkeýde turǵan kólikterdi satyp alarda ákimshilik politsiia nemese jergilikti politsiia qyzmeti basqarmasyna júginip, teksertip alý qajet» - deidi Berik Amangeldi.
