Atyraý oblysynyń meditsinalyq mekemeleri koronavirýstyń jańa tolqynyna daiyn. Bul týraly búgin Atyraý oblysynyń ákimi Mahambet Dosmuhambetov aitty, dep habarlaidy QazAqparat.
Ortalyq kommýnikatsiialar qyzmeti alańynda ótken baspasóz máslihaty barysynda Mahambet Dosmuhambetov óńirdegi koronavirýs infektsiiasyna qatysty ahýaldyń turaqty ekendigin aitty. Onyń dereginshe, oblysta dárigerlerdiń jetispeýshiligi úshten birge qysqardy. Jumysqa 93 jas maman tartylyp, olardyń 35-i aýdandarǵa jiberildi. Indetpen kúrestiń aldyǵy shebinde júrgen barlyq meditsina qyzmetkerlerine 2 mlrd teńgeden astam ústemeaqy tólendi.
«Densaýlyq saqtaý salasynda materialdyq-tehnikalyq bazany nyǵaitýda aýqymdy jumys júrgizilip jatyr. Biyl 7 nysannyń qurylysy aiaqtaldy. Juqpaly aýrýlarǵa arnalǵan tósek-orynnyń 8,1 paiyzy ǵana bos emes. 46 naýqas em alýda jáne onyń 2-eýi reanimatsiiada jatyr. COVID-19-dyń jańa tolqynyna daiyndyq aiasynda oblysta 2 080, onyń ishinde 120 reanimatsiialyq tósek-oryndyq 12 statsionar ázirlendi. Atyraýda 200 tósek-orynǵa arnalǵan modýldik juqpaly aýrýlar aýrýhanasynyń qurylysy aqiataldy. Jyldyń sońyna deiin Jylyoi aýdanynyń Qulsary qalasynda 200 tósek-orynǵa arnalǵan modýldik statsionar qurylysynyń aiaqtalatyndyǵy josparlanǵan», - dedi óńir basshysy.
Mahambet Dosmuhambetovtiń aitýynsha, oblysta 4 MRT apparaty, 12kompiýterlik tomografiia apparaty, 668 ottegi kontsentraty, 256 ókpeni jasandy aparatty bar bar. Jyl sońyna deiin taǵy 51 ókpeni jasandy jeldetý apparaty jetkiziledi. Óńir jedel járdem kólikterimen 100 paiyz qamtamasyz etilgen. 5 mobildi diagnostikalyq meditsinalyq keshen shalǵai aýdandarynyń turǵyndaryna meditsinalyq kómek kórsetip júr.
