QR Premer-Ministrdiń orynbasary Eraly Toǵjanov Atyraý oblysyndaǵy epidemiologiialyq ahýaldy turaqtandyrýǵa bailanysty qolǵa alynatyn máseleler týraly aityp berdi, dep habarlaidy "Ult aqparat".
Eraly Toǵjanovtyń málim etýinshe, Atyraý oblysynda koronavirýs infektsiiasyn juqtyrý deregi respýblikadaǵy eń joǵary kórsetkish bolyp otyr.
«Sońǵy táýlikte Atyraý oblysynda koronavirýs infektsiiasyn juqtyrýdyń 336 jaǵdaiy tirkelip, naýqastardyń jalpy sany 7150 adamǵa jetti. Indettiń negizgi oshaqtary – Atyraý qalasy men Jylyoi aýdany. Osy eki jerde qaýipti indetke shaldyqqandar barlyq naýqastyń 85 paiyzyn qurap otyr. Al, pnevmoniianyń 2174 jaǵdaiy tirkelgen. Sońǵy eki aida jedel meitsinalyq járdemdi shaqyrý 2 esege ósken. Munyń bári shuǵyl sharalar qabyldaýdy qajet etedi» -dedi Eraly Toǵjanov onlain brifingte.
Onyń aitýynsha, Atyraýdaǵy epidemiologiialyq ahýaldy turaqtandyrýǵa bailanysty qolǵa alynatyn máseleler jan-jaqty talqylanǵan.
«Birinshiden, Atyraýdan Almatyǵa, Aqtóbe men Mańǵystaýǵa temir jol qatynasy toqtatylady. Ekinshiden, meiramhanalar men dámhanalar, ashanalar men qoǵamdyq tamaqtaný oryndary, azyq-túlik emes dúkender úige jetkizý rejimimen jumys isteidi. Úshinshiden, politsiia departamenti jáne oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti otbasylyq sharalardy ótkizýge salynǵan tyiymnyń saqtalýyn qadaǵalap, ony buzǵandardy anyqtaýdy qamtamasyz etýi tiis. Tórtinshiden, Energetika ministrligi jergilikti atqarýshy organdarmen vahtalyq jumysqa keletinderdi úsh kún buryn turǵylyqty mekenjaiynda PTR-testten ótkizýi kerek. Bul tapsyrmanyń oryndalýyna jumys berýshiler jaýapty bolady.
Besinshiden, Atyraý oblysynyń ákimdigi dári-dármekpen qamtý máselesin sheshýi qajet. Óńirdegi, sonyń ishinde Jylyoi aýdanyndaǵy karantindik shekteý sharalarynyń saqtalýyn baqylaýǵa alýy kerek. Mobildi toptardyń sany 120-ǵa jetkizý, korotaksi qyzmetin uiymdastyryp, jeke klinikalardy naýqastardy emdeý isine tartýy qajet» -dedi Eraly Toǵjanov.
Sondai-aq, Densaýlyq saqtaý ministrligine arnaiy tapsyrmalar júktelgen. Onyń ishinde Atyraý oblysyn meditsinalyq kadrlarmen qamtamasyz etý de bar.
