Astananyń 20 jyldyq mereitoiy qurmetine Atyraý oblysy elordanyń oń jáne sol jaǵalaýlaryn jalǵaityn kópir salyp beredi, dep habarlaidy QazAqparat tilshisi.
Bul týraly oblys ákimi Nurlan Noǵaev Ortalyq kommýnikatsiialar qyzmetinde ótken brifingte málim etti.
"Astananyń 20 jyldyǵy biylǵy jyldyń eń aitýly oqiǵasy. Árine, Atyraý oblysy bul aýqymdy sharaǵa óz úlesin qosady", - dep jaýap berdi Nurlan Noǵaev jýrnalister suraǵyna.
Ákimniń aitýynsha, kópir qurylysy 6 mlrd teńgege ainaldy jáne qurylys jumystary bastalyp ketti.
«Biz Astanadaǵy Mádeniet kópiri mańynda oń jáne sol jaǵalaýdardyń arasyn jalǵaityn kópir qurylysyn bastap kettik. Kópirge oblystyq biýdjetten qarjy jumsaldy, demeýshiler de qol ushyn sozdy. Joba quny shamamen 6 mlrd teńgeni quraidy", - dedi Nurlan Noǵaev.
Eske sala ketsek, Astana qalasynyń boi kótergenine biyl 20 jyl tolady. Ataýly dataǵa orai, elordada túrli mádeni sharalar ótkizý josparlanǵan.
