Búgin Qairat Nurlybaev Atyraý oblysy ákiminiń orynbasary bolyp taǵaiyndaldy. Óńir basshysy Mahambet Dosmuhambetov kandidatýrasy Prezident Ákimshiligimen kelisilgen jańa orynbasaryn jergilikti aktivke tanystyryp, jumysyna tabys tiledi, – dep habarlaidy ákimdiktiń baspasóz qyzmeti.
Qairat Nurlybaev 2019 jyldyń maýsym aiynan beri Atyraý oblysy aýyl sharýashylyǵy basqarmasynyń basshysy laýazymynda jumys istep keldi. Al 4 jyl oblys ákiminiń orynbasary bolǵan Álibek Náýtiev jaqynda Atyraý oblystyq máslihatynyń hatshysy bolyp sailanǵan bolatyn.
«Qairat Esqabylulyn bilikti basshy, jumys tájiribesi mol azamat retinde osy laýazymǵa laiyqty dep esepteimin jáne oǵan úlken senim artamyn. Al Álibek Ibatollaulyna Atyraý oblysynyń áleýmettik-ekonomikalyq damýyna qosqan eleýli úlesi úshin zor alǵysymdy bildiremin»,-dedi Atyraý oblysynyń ákimi Mahambet Dosmuhambetov.
Qairat Esqabyluly Nurlybaev 1973 jyly 2 mamyrda Atyraý oblysy Qyzylqoǵa aýdanynyń Muqyr aýylynda dúniege kelgen. Bilimi joǵary, Batys Qazaqstan aýyl sharýashylyǵy institýtyn «injener-mehanik», H.Dosmuhamedov atyndaǵy Atyraý ýniversitetin «ekonomist» mamandyǵy boiynsha bitirgen.
Eńbek jolyn 1995 jyly Aqtóbe oblysy Qobda aýdandyq máslihatynda aǵa referent retinde bastaǵan. 1996-1997 jyldary Atyraý oblysy Qyzylqoǵa aýdanyndaǵy «Muqyr» aktsionerlik qoǵamynda jóndeýshi-tehnik bolyp jumys istegen. 1999 jyly Qyzylqoǵa aýdanynyń Muqyr selolyq okrýgi ákiminiń apparatyna maman bolyp kirip, Qyzylqoǵa aýdany Muqyr selolyq okrýginiń ákimi, Qyzylqoǵa aýdanynyń kommýnaldyq menshik, kóriktendirý, qurylys jáne turǵyn-úi sharýashylyǵy bóliminiń meńgerýshisi qyzmetterin atqardy.
Odan keiin Qurmanǵazy aýdanynyń Shortanbai selolyq okrýginiń ákimi, Qurmanǵazy aýdandyq ishki saiasat bóliminiń odan soń atalǵan aýdannyń jer qatynastary bóliminiń basshysy, sondai-aq Maqash selolyq okrýginiń ákimi bolyp jumys istedi. 2008-2012 jyldary Inder aýdany ákimi apparatynyń basshysy, 2012-2019 jyldary atalǵan aýdan ákiminiń orynbasary boldy.
