Atyraý oblysy ákiminiń burynǵy birinshi orynbasary 10 jylǵa sottaldy, dep habarlaidy QazAqparat.
Búgin Atyraý oblysynyń qylmystyq ister jónindegi mamandandyrylǵan aýdanaralyq sotynda oblys ákiminiń burynǵy birinshi orynbasary Nurlan Taýbaev pen oblystyq qurylys basqarmasynyń basshysy Timýr Basarovty aiyptaý boiynsha qylmystyq is qaraldy.
«2020 jyldyń shilde aiynda Atyraý oblysynyń ákimdigimen Jylyoi aýdanynyń Qulsary qalasynda aýrýhana salý týraly sheshim qabyldandy. Qurylys jumystaryn «BKK» JShS oryndaǵan. Sottalýshy Nurlan Taýbaev oblys ákiminiń orynbasary bola tura jáne qurylys salasyna jetekshilik ete otyryp, «BKK» JShS direktorynyń orynbasarynan kelisimshart somasynyń 10% mólsherinde para talap etken. Keiin sottalýshy Timýr Basarovtnyń (qurylys basqarmasynyń basshysy) qatysýymen para somasy 7%-ǵa, 185 500 000 teńge mólsherinde kelisilgen. Nurlan Taýbaev sottalýshy Timýr Basarovqa aqsha qarajatyn alyp kelýdi tapsyrǵan. Sodan keiin Timýr Basarov jábirlenýshiden 185 730 004 teńge (423 900 AQSh dollary jáne 5 000 000 teńge) mólsherinde para alǵan. Para berý barysynda Timýr Basarov sybailas jemqorlyqqa qarsy Agenttiktiń qyzmetkerlerimen ustalǵan», - dep habarlady oblystyq sottyń baspasóz qyzmeti.
Sot talqylaýy kezinde kórsetilgen mán-jailar men sottalýshylardyń kinási sottalýshy Timýr Basarovtyń kinásin tolyq moiyndaý jaýabymen, jábirlenýshiniń, kýálardyń aiǵaqtarymen, oqiǵa bolǵan jerdi qaraý hattamalarymen, jeke tintýmen, Whatsapp messendjerindegi hat almasýmen, baqylaý kameralarynyń beinejazbasymen, arnaýly jedel izdestirý is-sharasy jáne jasyryn tergeý áreketiniń nátijelerimen, saraptama qorytyndylarymen óz dálelin tapqan.
«Sot sottalýshy Nurlan Taýbaevty QR Qylmystyq kodeksiniń 24-babynyń 3-bóligi, 366-babynyń 4-bóligimen (memlekettik qyzmetti atqaratyn laýazymdy adamnyń qorqytyp alý jolymen adamdar tobynyń aldyn ala sóz bailasýymen asa iri mólsherde para alýǵa oqtalýy), Timýr Basarovty Qylmystyq kodekstiń 28-babynyń 5-bóligi, 24-babynyń 3-bóligi, 366-babynyń 4-bóligimen (atalǵan is-áreketterge kómektesý) kináli dep tanydy. Nurlan Taýbaevtyń qabyldaǵan antty buzý arqyly qylmys jasaǵany jazany aýyrlatatyn jaǵdai retinde tanylyp otyr», - dep málim etti baspasóz qyzmetinen.
Sot úkimimen Nurlan Taýbaevqa 10 (on) jyl bas bostandyǵynan aiyrý jazasy taǵaiyndaldy. Sottalýshy Timýr Basarovqa jazany aýyrlatatyn mán-jailar men zań talaptarynyń (jaza 8 jyl 5 aidan aspaidy) bolmaýy eskerile otyryp, QR Qylmystyq kodeksiniń 55-babynyń 4-bóligi qoldanylyp, 5 jyl bas bostandyǵynan aiyrý jazasy taǵaiyndaldy.
Eki sottalýshy da ómir boiy memlekettik qyzmette jumys isteý quqyǵynan aiyryldy.
Sot úkimi zańdy kúshine engen joq.
