Atyraý oblystyq tarihi-ólketaný mýzeiinde Táýelsizdiktiń 30 jyldyǵy jáne Tuńǵysh Prezident kúni qarsańynda «Elbasy jáne Táýelsiz Qazaqstan tarihy», «Ulyq Ulys – Altyn Orda» ekspozitsiialyq zaldary ashyldy, dep habarlaidy QazAqparat.
Saltanatty sharaǵa qatysqan mádeniet jáne qoǵam qairatkerleri, ǵalymdarǵa ekspozitsiialyq zaldardaǵy jádirgerler tanystyryldy. Oblys ákimi Mahambet Dosmuhambetov is-sharaǵa qatysýshylardy Tuńǵysh Prezident kúnimen quttyqtap, Táýelsizdiktiń 30 jylynda iske asyrylǵan jobalarǵa toqtalady.
«Qasterli Táýelsizdigimizdiń 30 jyldyǵy – qaita jańǵyrǵan qazaq memlekettiginiń, ata-babalarymyz ańsaǵan azattyqtyń tuǵyry nyǵaia túskenin áigileitin mańyzdy beles. Táýelsiz memleket bolyp álemdegi órkenietti elder qatarynan kórindi. Elbasy-Tuńǵysh Prezident Nursultan Nazarbaevtyń basshylyǵymen memleketimizdiń shekarasy shegendelip, bilik júiesi qalyptasty, ulttyq valiýtamyz ainalymǵa endi, Qarýly Kúshterimiz quryldy, Ata zańymyz qabyldandy, shet eldermen diplomatiialyq qatynas ornady, elimiz bedeldi halyqaralyq uiymdarǵa múshe boldy. «Qazaqstan – 2030», «Qazaqstan – 2050» strategiialyq baǵdarlamalary qabyldanyp, ozyq damyǵan otyz eldiń qataryna qosylýdy mejeledik», - dedi Mahambet Dosmuhambetov.
Ákimniń aitýynsha, táýelsiz memlekettiń qurylýy men nyǵaiý tarihynan syr shertetin materialdardy toǵystyrǵan, Elbasynyń ómir jolyn baiandaityn tarihi derekter men qairatkerlik qyryn kórsetetin muraǵat qujattary toptastyrylǵan «Elbasy jáne Táýelsiz Qazaqstan tarihy» ekspozitsiia zalynyń orny erekshe. Sondai-aq Táýelsizdiktiń 30 jyldyǵyn merekeleý aiasynda ashylǵan «Ulyq Ulys – Altyn Orda» zalynyń urpaq tárbiesinde alar orny erekshe bolmaq.
QR Bilim jáne ǵylym ministrligi Ǵylym komiteti Memleket tarihy institýtynyń direktory, tarih ǵylymdarynyń doktory, professor Erkin Ábil ashylǵan zaldyń keler urpaqqa mańyzyn aityp berdi.
«Búgingi ashylǵan ekspozitsiia tarihi sanany jańǵyrtý jolyndaǵy kezekti qadam dep aitýǵa bolady. Mýzei – tarihi jádigerlerdi saqtaý ǵana emes, óskeleń urpaqqa ata-babamyzdan qalǵan muralar arqyly tálim-tárbie berýge arnalǵan úlken áleýmettik nysan. Sondyqtan búgingi is-sharanyń mańyzy zor dep bilemin. Óitkeni, ujymdyq tarihi jadymyzdy qalyptastyrý arqyly ulttyq sanamyzdy jańǵyrta alamyz», - dedi Erkin Ábil.
Al Qazaqstannyń Qurmetti jýrnalisi, ólketanýshy Tólegen Jańabaiuly, «Saraishyq memlekettik mýzei-qoryǵy» mekemesiniń direktory, tarih ǵylymdarynyń doktory, professor Ábilseiit Muqtar, H.Dosmuhamedov atyndaǵy Atyraý memlekettik ýniversitetiniń oqytýshysy, tarih ǵylymdarynyń kandidaty Marat Qasenov óńirdegi tarihi qalalar men kóne Saraishyq týraly pikirlerin ortaǵa saldy.
