Atyraý oblysynyń bas memlekettik sanitar dárigeri Sádýaqas Baiǵabylov dárihanada alypsatarlyqqa jol bermeý jáne dári-dármektiń shekti baǵasyn saqtaýǵa bailanysty júrgizilgen monitoring nátijesin aitty, dep habarlaidy "Ult aqparat".
Sádýaqas Baiǵabylovtyń málim etýinshe, Atyraý qalasynyń turǵyndary áleýmettik jelide dárihanalardaǵy dári-dármek baǵasynyń kóterilgenin aityp shaǵymdanǵan. Osyǵan orai, mobildi toptar Atyraý oblysynyń 50 dárihanasyna tekserý júrgizgen.
«Tekserý barysynda dárihanalarda dári-dármek baǵasynyń kóterilgeni anyqtaldy. Máselen, «Novigan Neo № 20» preparaty - 600-800 teńgeden (shekti baǵasy - 583 teńge), «Aspirin Kardio 100 mg № 28» - 1500 teńgeden (shekti baǵasy - 1271 teńge), «Kardiomagnil 75 mg № 100» - 1900 teńgeden (shekti baǵasy - 1802 teńge) satylǵan. Qazir oblystyq taýarlar men qyzmetterdiń sapasy men qaýipsizdigin baqylaý departamentiniń mamandarymen atalǵan faktiler boiynsha 9 ákimshilik is qaralyp jatyr. Shaǵyn jáne orta kásipkerlik nysandaryna QR Ákimshilik quqyq buzý kodeksiniń 426-babymen 130-dan 1000-ǵa deiingi ailyq eseptik kórsetkish kóleminde aiyppul salynady», - dedi Atyraý oblysynyń bas memlekettik sanitar dárigeri Sádýaqas Baiǵabylov.
Sondai-aq, «Ortodont» JShS dárihanasynan 10 túrli tirkelmegen dári-dármek tabylǵan. Al, «Verdant» kosmetologiialyq kabinetinde farmatsevtikalyq litsenziialyq qujatsyz ári zańsyz kásipkerlikpen ainalysý deregi tirkelgen. Munda 116 túrli tirkelmegen dári satylǵan. Onyń ishinde «Kleksan», «Deksametazon», «Azitromitsin» sekildi tapshy dári-dármekter bolǵan.
Qazir eki derek boiynsha ekonomikalyq tergeý departamenti tergeý júrgizip jatyr.
