Foto: © Sputnik / Vladislav Vodnev
Májilis depýtaty Ádil Jubanov Úkimetke Atyraý oblysyn ekologiialyq daǵdarys aimaǵy dep tanyp, jeńildikter men ótemaqy tóleý júiesin engizýdi usyndy, dep habarlaidy Sputnik Qazaqstan.
Májilis depýtaty Ádil Jubanov Premer-ministrdiń birinshi orynbasary Roman Skliarǵa joldaǵan depýtattyq saýalynda Atyraý qalasynyń ekologiiasyn qozǵady.
"Oblystaǵy ekologiialyq ahýal – respýblikalyq deńgeidegi problemaǵa ainalǵanymen halyqtyń jan-aiqaiyn estitin ministrlik te, Úkimet te joq. Jyl saiyn óńirde onkologiialyq aýrýlar beleń alyp, múmkindigi shekteýli, týabitti naýqas balalar sany artyp otyr. Ashynǵan atyraýlyqtar beibit mitingke shyǵyp, oblystaǵy jer qoinaýyn paidalanýshylar men úkimetke naqty talaptaryn qoidy. Túptep kelgende, Atyraý halqy taza aýaǵa zárý", - deidi Jubanov.
Májilismen "30 jyl ishinde Atyraýdyń tek donor aimaq retinde qaralyp, oblystyń ekonomikalyq-áleýmettik damýyna memlekettik deńgeide kóńil bólinbeýi – Atyraý halqyna jasalǵan ádiletsizdik" dep esepteidi.
"Búkil eldi munaiymen asyrap, tutas eldiń kem-ketigin jamap otyrǵan Atyraýdyń halqy bir kúnde uiqydan oianbai qalýy múmkin. Sondyqtan da atyraýlyqtardyń ekologiiaǵa qatysty talaptary oryndy, suraýlary zańdy", - dep sanaidy halyq qalaýlysy.
Osy oraida Jubanov Atyraýdyń ekologiiasyn jaqsartýdy Úkimet deńgeiinde sheshý úshin birneshe usynys joldady.
Birinshisi – Úkimet jaýapty ministrliktermen birlesip, Atyraý oblysyn ekologiialyq daǵdarys aimaǵy dep tanyp, ekologiialyq koeffitsient, jeńildikter men ótemaqylar tóleý júiesin engizýi qajet.
Ekinshiden, depýtattyń aitýynsha, Atyraý qalasy atmosferasynyń óndiristik obektilermen, ásirese Atyraý munai óńdeý zaýytymen lastanýy qaýipti deńgeige jetken. Osyǵan bailanysty QazMunaiGaz kompaniiasyna Atyraý MÓZ-de tehnologiialyq aýdit júrgizip, zaýytta tolyqtai ekologiialyq jańǵyrtý jumystaryn aiaqtaý, qorshaǵan ortaǵa teris áserdi joiýdy mindetteý qajet.
"Nemese zaýytty qaladan kóshirý máselesi qarastyrylsyn", - dep usyndy Jubanov.
Sondai-aq, Atyraý munai óńdeý zaýytynyń ónerkásip obektilerinen 1 000 metrge jetpeitin qashyqtyqta turǵyn úiler ornalasqan. "GeoPortal" aqparattyq júiesine sáikes, búginde zaýyttyń sanitarlyq qorǵaý aimaǵynda 40-tan astam úi qalyp otyr. Bul úilerdiń eleri zaýyttyń iisinen ýlanyp, densaýlyǵyna ziian kelgenin alǵa tartyp, narazylyq aktsiialaryn uiymdastyrýda.
"Osyǵan bailanysty QazMunaiGaz zaýyttyń sanitarlyq-qorǵaý aimaǵynyń shekarasyn qaita belgileý jáne atalǵan turǵyn úilerdi kóshirý máselesin shuǵyl sheshýi qajet", - dep málimdedi depýtat.
Úshinshisi – Atyraý oblysy boiynsha I sanatty kásiporyndardyń atmosferaǵa shyǵaryndylarynyń shekti kórsetilgen kólemin qaita qarap, eki ese tómendetý kerek. Qazba bailyqty igerip jatqan kompaniialardy jańa tehnologiialardy engizýge yntalandyratyn zań normalary qabyldanýǵa tiis.
Tórtinshisi – Atyraý oblysyndaǵy ekologiialyq ahýaldy jaqsartý baǵytynda birqatar qorshaǵan ortany qorǵaý jobasyn júzege asyrý qajet. Olar: Atyraý qalasynda kárizdik sýlardy tazartý qondyrǵylaryn salý jáne qaita jańǵyrtý, qatty turmystyq qaldyq poligondaryn jáne qoqysty qaita óńdeý keshenderin salý jobalary.
"Joǵaryda atalǵan usynystar negizinde Úkimet deńgeiinde memlekettik komissiia qurý, Úkimetke oblystaǵy ekologiialyq ahýaldy tolyqqandy sheshý joldaryn usynyp, keshendi jospar qabyldaýdy suraimyn. 30 jyl eldi asyrap kele jatqan Atyraýdyń munaiy ǵana emes, adamy da qymbat ekenin esten shyǵarmai, shuǵyl sharalar qabyldaýǵa shaqyramyn", - dedi májiliske Atyraý oblysynan sailanǵan depýtat.
