Atyraý oblysynda perinataldy ortalyǵynyń basshysy men dárigeri jańa týǵan náresteni tońazytqysh kamerasyna salyp óltirdi degen kúdikke ilingen. Bul týraly Sybailas jemqorlyqqa qarsy is-qimyl agenttigi tóraǵasynyń orynbasary Shyńǵys Qabdolla málim etti, dep habarlaidy QazAqparat.
«Gippokrattyń antyna adal bolýdy ýáde etken densaýlyq saqtaý salasynyń qyzmetkerleri jańa týǵan náresteni tońazytqysh kameraǵa salyp óltirdi degen kúdikke ilindi. Tekserý nátijesinde anyqtalǵanyndai, jańa týǵan bala qateliktiń saldarynan qujat boiynsha óli týǵandardyń qataryna engizilip ketken. Shyntýaitynda ol tiri bolǵan. Balanyń tiri ekenin bilgennen keiin dárigerler ońaltý amaldary boiynsha shuǵyl sharalardy qabyldaýdyń ornyna resimdelgen qujat boiynsha, sábidi shetinep ketkenshe sol jerde qaldyrǵan. Dárigerdiń áreketiniń bir sebebi – toltyrylyp qoiǵan qujat. Ol túzetilmegen», - dedi Shyńǵys Qabdolla elordadaǵy brifingte.
Perzenthanaǵa birden kelgen jedel tergeý toby atalǵan oqiǵanyń mán-jaiyn anyqtaǵan.
«Shaqalaqtyń denesi tońazytqysh kamerasynan tabyldy. Ýaqyt boiynsha úlgere almai qaldyq. Sot sanktsiiasymen kúdiktiler tutqynǵa alynyp, sotqa deiingi tergeý amaldary júrgizilip jatyr», - dedi ol.
Perzenthana ortalyǵynyń basshysy men áieldi bosandyrǵan akýsher-ginekologtyń ústinen qylmystyq is qozǵaldy.
Áý basta atalmysh fakt boiynsha QR QK 317-baby boiynsha sotqa deiingi tergeý amaldary júrgizilgen. Alaida istiń mán-jaiy anyqtalǵannan keiin atalǵan eki adamǵa taǵylǵan aiyp QR QK 99-babyna (qasaqana kisi óltirý) ózgertilgen.
