Qyzylqoǵa aýdany Qarabaý aýylynyń bir top turǵyny prezident Qasym-Jomart Toqaevqa, premer-ministr Oljas Bektenovke jeli arqyly beineúndeý joldady, dep habarlaidy "Ult aqparat" KAZ.NUR.KZ basylymyna silteme jasap.
Marqumnyń týystary jáne aýyldastary dúkenine azyq-túlik alýǵa kelgen kásipker Amandyq Saǵynǵalievty judyryqtyń astyna aldy degen kúdikti jeńil jazamen qutylyp kete me dep alańdaýshylyq bildirgen.
Qarabaý aýylynyń turǵyny Amandyq Saǵynǵaliev 5 maýsymda Atyraý qalasyndaǵy ortalyq "Dina" bazarynda alǵan jaraqatynan es jimastan oblystyq aýrýhananyń jansaqtaý bóliminde kóz jumdy. Aýyl azamatyn judyryqtaǵan sát túsirilgen video áleýmettik jelide tarap, halyqtyń qyzý talqysyna túsken edi. Endi aýyldastary kúdiktige qatysty isti ádil tergeýdi talap etip, beineúndeý jasady.
"Men óte aýyr jaǵdaida, iaǵni qanisherdiń kesirinen ákemnen aiyrylyp otyrmyn. Sottan qanisherdiń qatań jaza alýyn suraimyn. Qanisher jazasyn almai meniń de, ákemniń de jany jai tappas. Eger sot ádil sheshim shyǵarmasa qanisherdi bizdiń qolymyzǵa bersin", - dep talap qoidy marqumnyń uly Nartai Amandyquly.
Sonymen qosa aýyl turǵyndary kásipkerdi ólimshi etip sabady degen kúdiktige qatysty Qylmystyq kodekstiń 106 baby 3-bóligi boiynsha qozǵalǵan isti tez arada 99-bap 2-bóliginiń 3,5,9-tarmaqtarymen qaita saralap, aiyptalýshyny qatań jazaǵa tartylýyn talap etedi.
"Biz Qyzylqoǵa aýdanynyń turǵyndary, is Qylmystyq kodekstiń 106 baby 3-bóligi, iaǵni abaisyzda kisi ólimine ákep soqqan degen aiyptaýmen qaralyp jatqanyna qarsymyz. Isti tez arada adam óltirý, iaǵni basqa adamdy quqyqqa qarsy qasaqana qazaǵa ushyratý degen bappen tergeýin talap etemiz. Esh qarsylyq kórsetpegen adamdy judyryqtap urý – bul abaisyzdyq emes. Sondai-aq oqiǵa ornynda janjaldy ajyratpaǵanymen qoimai, azamatymyzdyń denesin birge súireskender de jazasyz qalmaýyn suraimyz", - deidi Qyzylqoǵa aýdanynyń turǵyny.
Bazardaǵy janjaldyń kýágeri bolǵan Amandyq Saǵynǵalievtyń jubaiy da pikir bildirdi. Aitýynsha, oqiǵa kezinde ol bazardyń ishinde sharýalardy rettep júrgen. Jubaiynyń qasyna kelgen kezde beti-aýyzy qanǵa boialǵanyn, jaǵy isip, es-tússiz jatqanyn kórgen. Qazirgi kezde otbasymen úlken qaiǵyny bastan keship otyrǵanyn aitady.
"Bazardan shyqqanymda joldasymdy otyrǵyzyp qoiǵan. Beti-aýzy qan. Soqqyǵa jyqqan jigit "Mashinamnyń esigin maiystyrdy" dep aiqailap júr. "Ákeńdei kisini nege urdyń, bárin de úilestirip beremiz ǵoi" degenimde, "eotsiiaǵa berilip bir urdym" dedi. Joldasym aýrýhanada bes kún ómirmen arpalysyp, aqyry bir qanisherdiń kesirinen ómirden ozdy. Qabyrǵamyz qaiysyp otyr, otbasy asyraýshysynan, balalar ákelerinen, nemereleri súiikti atalarynan aiyrylyp otyr. Qanisherdiń qatań jazalanýyn suraimyz", - deidi marqumnyń jary.
Bul is boiynsha Atyraý oblystyq politsiia departamenti pikir bildirdi. Qylmystyq istiń materialdary áli sotqa berilmegen.
"Qazirgi tańda tergeý júrip jatyr. Qajetti sotqa deiingi barlyq keshendi tergeý amaldary júrgizilip jatyr. Kúdikti ýaqytsha ustaý izoliatorynda qamaýda", - dep jaýap berdi Atyraý oblystyq politsiia departamentiniń baspasóz hatshysy Meiirim Erdáýlet.
