Óz atyńyzǵa tirkelgen SIM kartany bireýge paidalanýǵa berýge bola ma? Bul suraqqa QR Tsifrlyq damý, innovatsiialar jáne aeroǵarysh ónerkásibi ministrligi Telekommýnikatsiia komitetiniń tóraǵasy Vitalii Iaroshenko jaýap berdi, dep habarlaidy "Ult aqparat".
«Bul qylmys pa, joq pa – ol suraqqa Ishki ister ministrligi jaýap berýi kerek. Eger sizdiń nómirińiz arqyly qylmys jasalsa, ol is qylmystyq jáne ákimshilik jaýapkershilik boiynsha qýdalanady», - dedi Vitalii Iaroshenko OKQ-da ótken baspasóz máslihatynda.
Dese de, nómirdi basqa bireýdiń paidalanýy – zańǵa qaishy kelmeitinin de atap ótti.
«Siz óz atyńyzǵa nómirdi tirkep, zaiybyńyzdyń nemese balańyzdyń paidalanýyna bere alasyz. Al eger ol nómir arqyly zańǵa qaishy áreket jasalsa, ol ispen ary qarai quqyq qorǵaý organdary ainalysady», - dedi spiker.
Vitalii Iaroshenko sonymen birge IMEI kod arqyly tekserý qazaqstandyqtarǵa yńǵaily bolýy úshin jasalǵanyn sóz etti.
«Eger bul qyzmet bolmasa, siz óz atyńyzda qansha nómirdiń tirkelgenin bile alatyn ba edińiz? Amalsyz, búkil bailanys operatorlaryn ainalyp, tólqujatyńyzdy kórsetip, áýrege túser edińiz. Turǵyndarǵa yńǵaisyzdyq týdyrmas úshin bul qyzmetti iske qostyq», - dedi ol.
Eske sala ketsek, búgingi baspasóz máslihatynda Vitalii Iaroshenko Qazaqstanda 18 million adamǵa 42 mln SIM kartanyń tirkelgenin aitqan edi. Ol sondai-aq, JSN arqyly bóten adamnyń sizdiń atyńyzdan uialy nómirdi paidalaný qaýipterin atady.
