Túrkistan oblysy men Shymkent qalasynda tutynýshylardyń senimine ie bolyp úlgergen brendti ári sapaly taýarlar az emes. Sonyń biri – «Aspan» taýar belgisimen shyǵarylatyn «Zavod «Triýmf M.M.S» JShS-niń profilderi. Qarapaiym tilmen túsindirsek, plastikalyq esik, tereze jaqtaýlary men terezealdy taqtailary.
Polivinilhloridten profilder shyǵaryp, keiin odan esik-terezeler jasaityn bul kásiporyndy naǵyz otandyq ónim óndirýshi mekeme dep tolyq senimmen aita alamyz. Osy kásiporynnyń qurylýymen otandyq PVH profilderi óndirisi salasyna jan bitti. Búginde osy tóńirektegi plastikalyq esik-tereze shyǵaratyn bes júzden astam shaǵyn tseh ieleri PVH profilderdiń ishinen dál osy «Aspan» markaly brendti tańdaidy. Osynyń ózi kásiporynnyń otandyq ishki naryqta tutynýshylar tarapynan úlken senimge ie bolǵanyn ańǵartsa kerek-ti.
Kompaniia taýarlary Qazaqstandaǵy iri qalalar men óńirlerden bólek, Tájikstan, Ózbekstan, Qyrǵyzstan elderine eksporttalýda. Endigi jerde otandyq ónimge budan ózge memleketter de zor qyzyǵýshylyq tanytýda. Osy rette alys shetelderge PVH profilderin eksporttaý máselesi qarastyrylyp jatyr. Buiyrtsa, jaqyn arada kompaniianyń ónimin satyp alýshy shet memleketterdiń qatary kóbeiip, eksporttyq áleýeti budan da arta túsetinine senim mol.
Elbasy Qazaqstan halqyna arnaǵan biylǵy Joldaýynda ýaqyt joǵaltpai tsifrly tehnologiiaǵa kóshýdi, olai bolmaǵan jaǵdaida báriniń de kesh bolyp, bul salada alǵa ozyp ketken elderdiń shańyn jutyp qalýymyz múmkin ekendigin aitty. «Zavod «Triýmf M.M.S» JShS Nursultan Ábishulynyń óndiristi tsifrlandyrýǵa orai bergen osy tapsyrmasyn tiianaqty oryndaǵan alǵashqy kásiporyndardyń biri deýge bolady.
Kásiporynda dýaldi oqytý júiesi boiynsha Shymkent qalasyndaǵy politehnikalyq kolledjdiń stýdentteri óndiristik is-tájiribeden ótip turady. Jumysqa ikemi bar kolledj túlekteri osynda ártúrli mamandyqqa sai jumysqa qabyldanady. Máselen, kezinde tájiribeden ótken on shaqty stýdent búginde laminant tsehynda jumys isteýde. Negizinde jumysqa turǵysy keletinderdi kompaniianyń ózi aqy tólep bir ai oqytady. Ári qarai qabiletine qarai jumysqa ornalastyrady. Desek te, polimer ónimderi boiynsha munda tehnologtar jetispeidi eken. Sondyqtan M.Áýezov atyndaǵy OQMÝ-men kelisimshartqa turyp jatyr. Jaqynda osy oqý ordasynyń oqytýshy-professorlary kásiporyndy aralap, jumysymen jaqynyraq tanysyp kórmek. Aita keterligi, óndiris ornynda Avstriia jáne Germaniianyń joǵary tehnologiialy qondyrǵylary paidalanylady. Jáne ónim memlekettik standart pen joǵaryda atalǵan elderdiń shikizat pen sapaǵa qoiatyn talaby boiynsha shyǵarylady. Búginde zaýytta 250 adam eńbek etedi. Ortasha ailyq jalaqylary 90 myń teńgeni quraidy. Turaqty eńbekaqydan bólek qosymsha bonýstar men syiaqylar beriledi.
Zaýytqa jergilikti azamattar kóbirek jumysqa tartylǵan. Sondyqtan kásiporyn óziniń tabys kózin eselep qana qoimai, elimizdiń áleýmettik máselesin sheshýge de oń yqpalyn tigizýde.
Zaýyttyń óz zerthanasy bar. Munda mamandar óndirilgen ónimniń sapasyn baqylaýda ustaidy. Talapqa sáikes PVH profilderi 40-45 gradýs aiaz ben ystyqqa tózimdi bolýy kerek. Ónimniń quramyna qosylatyn himiialyq qospalardyń mólsheri de normasynan aýytqymaýy tiis. Osylardyń bárin zerthana mamandary tekserip, jiti kózben baqylap otyrady. Munymen qosa, «Aspan»-nyń terezeleri uzaq ýaqyt kúnde tursa da sarǵaiyp ketpeidi. Sebebi, profildiń quramyndaǵy titan qospasy tereze jaqtaýlaryn sarǵaiýdan saqtaidy.
Qoryta aitqanda, mundai kásiporyn elimiz úshin óte kerek. Osyndai zamanaýi óndiristiń arqasynda Qazaqstanda ǵana emes, shetelderde de suranys týdyrǵan ónimder shyǵarylyp, sonyń nátijesinde memlekettiń de tabysy molaia túsetini aian. Búginde el Úkimeti syrtqa taýar eksporttaityn óndiris oryndaryn kóbeitýge, olarǵa barynsha jeńildikter usynyp, qarjylai qoldaý kórsetýge múddeli. Sebebi, eksporttan memleket qazynasyna anaǵurlym kóp paida túsedi. Eki qolǵa bir kúrek tappai júrgenderdi eńbekke tartyp, eldegi jumyssyzdyq deńgeiiniń azaiýyna septigin tigizetin de iri jáne shaǵyn kásiporyndar. Sondyqtan biz seriktestiktiń aldaǵy isterine tek sáttilikter tilep, «Aspan»-nyń áli talai biik maqsattardy baǵyndyratynyna senemiz.
"Ońtústik Qazaqstan"
