Foto: Ulysmedia.kz
Eks-Mádeniet jáne sport ministri, Ulttyq mýzeidiń burynǵy basshysy Arystanbek Muhamediuly sotta sońǵy sózin aitty, - dep habarlaidy Tengrinews.kz saity.
Qylmystyq is boiynsha sot protsesi aiaqtalýǵa jaqyn. Astana qalasy Baiqońyr aýdanynyń №2 sotynda aiyptalýshynyń sońǵy sózi tyńdaldy.
"Men eldiń zańdaryn buzǵan joqpyn, kináni tolyq moiyndamaimyn. Osydan týra eki ai buryn bastalǵan sot protsesi meni ǵana emes, búkil halqymyzdy meniń sózderimniń rastyǵyna sendirdi. Meniń shynaiylyǵymnyń dáleli - aiyptaý aktisiniń jańa qorytyndysynyń bolýynda. Onda prokýror el zańdaryn urlaý, kelisý jáne buzý derekterin keltirmegen. Barlyq shaqyrylǵan kýágerler urlaý derekteri bolmaǵanyn, tipti aiyptalýshylar tarapynan zańsyz áreketter bolmaǵanyn senimdi túrde qaitalady", - dedi eks-ministr.
Muhamediuly "álem murajailary arqyly Altyn adamnyń sherýi" kórmesiniń ainalasyndaǵy jaǵdai týraly sóz qozǵap, Qazaqstanda koronavirýstyq shekteýler aiaqtalǵanǵa deiin "Altyn adam" túrindegi artefakt Úndistanda qalǵanda joǵalýy múmkin ekenin aitty.
"Qazirgi ýaqytta "Altyn adamdy urlap ketkendei" áldebir jaǵymsyzdyqpen bailanystyrady. Biraq "Altyn adam" Ulttyq mýzeide. Repressiialyq áreketterden keiin "Altyn adamnyń" kórmesin kim ótkizgisi keledi? Problemalyq tarihy bar kórmeni eki jaq ta qabyldaǵysy kelmeidi. Úndilik tarap tań qaldy. Kórme otyz kún emes, úsh kúnde ótti. Bul lokdaýynnyń engizilýine bailanysty boldy. Biz Altyn adamdy alystaǵy Úndistanda qaldyrmai, elimizge ýaqytyly jetkizdik dep oilaimyn", - dedi eks-ministr.
Ulttyq mýzeidiń eks-basshysynyń aitýynsha, sot isi mýzei vetrinalarynyń, shaqyrý biletteriniń, býkletterdiń, katalogtardyń qunyna, aýditorlyq kompaniia oilap tapqan derekterge baǵyttalǵanyn aitty.
"Qurmetti sýdia, men kez kelgen jazaǵa kelisemin, tipti atý jazasy bolsa da. Biraq jymqyrdy degenge emes. Qazaqta "Ólimnen uiat kúshti" degen maqal bar. Men alpys jyl laiyqty ómir súrdim", - dep túiindedi sózin Arystanbek Muhamediuly.
Buǵan deiin prokýror burynǵy Mádeniet jáne sport ministrin 9 jylǵa bas bostandyǵynan aiyrýdy suraǵan.
Aita keteiik, sottalýshylar oryndyǵynda taǵy úsh adam — Almaz Nurazhan (Ulttyq mýzei direktorynyń burynǵy orynbasary), Azamat Kóshenov ("Eksponat" JShS direktory) jáne Aiym Sádýaqasova ("Eksponat" JShS býhgalteri) bar. Memlekettik aiyptaýshy olarǵa 8 jyl surap otyr.
Eske salaiyq, eks-ministr Arystanbek Muhamediulyna Astanadaǵy Ulttyq mýzeidiń direktory bolǵan kezinde "biýdjet qarajatyn ysyrap etti" degen aiyp taǵylǵan bolatyn. Oǵan "Altyn adamnyń álem murajailary boiynsha sherýi" halyqaralyq kórmesin ótkizýge, sondai-aq "Qazaqstannyń ulttyq kieli nysandary men mýzei qorlaryn jalpymemlekettik fotogrammetriialyq 3D-skanerleý" jáne "Qazaqstan Respýblikasynyń Ulttyq tsifrlyq kinokollektsiiasyn tsifrlandyrý" jobalaryna bólingen biýdjet qarajatyn urlady jáne laýazymdyq ókilettigin teris paidalandy degen aiyp taǵylyp otyr.
Tergeý materialdaryna súiensek, sottalýshylar 221 mln teńge jymqyrǵan.
Arystanbek Muhamediuly 2022 jyldyń mamyr aiynan beri qamaýda otyr.
