Atbasar qalasynda sý tasqynynyń qaýipti aýmaǵynan 459 otbasy kóshirildi. Aýdan boiynsha taǵy 502 otbasyn kóshirý josparlanyp otyr. Bul týraly aimaq basshysy Ermek Marjyqpaev áleýmettik jelidegi paraqshasynda jazdy, dep habarlaidy "Ult aqparat".
«Kóktemgi sý tasqynynyń aldyn alý maqsatynda 54 eldimekende (14 aýdandaǵy) sý tasqynyna qarsy is-sharalar, sý ótkizetin 41 nysandy jóndeý jumystary júrgizildi, sý aǵatyn 27 shaqyrym arna tereńdetildi jáne keńeitildi, 16,5 shaqyrym bóget pen topyraq úiindisi nyǵaityldy, 17 shaqyrym bóget turǵyzyldy, ózen arnasynyń 5 shaqyrym aralyqta túbi tazartyldy.
Budan bólek, 181 tonna janar-jaǵar mai, 8 myń tonna inertti materialdar men qum salýǵa arnalǵan 50 myń qap qor jasaldy. Eldimekenderden 800 myńnan astam tekshe metr qar shyǵarylyp, 2445 adam men 1090 arnaiy tehnika, 229 motopomp, 60 júzý quraly ázirlendi. Sý tasqynynyń aldyn alý maqsatynda 66 gidro-meteostansa men beket baqylaý jasap otyrady, buǵan qosymsha taǵy 97 baqylaý beketi uiymdastyrylady»,— deidi E.Marjyqpaev.
Aimaq basshysynyń málimetinshe, Jol kartasy sheńberinde 2020 jylǵa josparlanǵan sharanyń 14-i júzege asyrylýda.
«Nur-Sultan qalasyn sý alyp qalýyna jol bermeý maqsatynda Esil ózeni jaǵasynyń dóńes jerin tegisteý jáne Nur-Sultan qalasy shekarasynan Araily aýylyna deiingi (Talapker aýylynan Araily aýylyna deiin) ózen arnasyn keńeitý boiynsha jobalyq-smetalyq qujattary ázirlendi. Esil ózeni arnasyn tabiǵi (topyraq, butalar, qamys) shógindilerden tazartý jumystary júrgizildi. Aǵyn sýdy apatsyz ótkizý sheńberinde Esil ózeni arnasyn keńeitý (buǵan 30 birlik arnaiy tehnika tartylyp, ózen arnasynyń eni 100 metr, uzyndyǵy 30 shaqyrymǵa deiingi aýmaǵy tazartylady) jumystary bastaldy. Atbasar qalasynda sý tasqynynyń qaýipti aýmaǵynan 459 otbasy kóshirildi, Atbasar aýdany boiynsha qaýipti aýmaqtan taǵy qosymsha 502 otbasyn kóshirý josparlanyp otyr. Qazirgi kezde Atbasar qalasynda 100 páterli 5 turǵyn úidiń qurylysy úshin qarjy bólý máselesi qarastyrylýda»,— deidi E.Marjyqpaev.
Sonymen qatar, aimaq basshysy atap ótkendei, gidrologiialyq málimetterdi naqtylaý boiynsha Jabai ózeni boiynsha (Atbasar jáne Sandyqtaý aýdandary) ekspeditsiia uiymdastyryldy. Onyń nátijesi boiynsha ózen ańǵarynda qardyń qalyńdyǵy 34 paiyzdan joǵary, ylǵal 2 ese kóp, sondai-aq, topyraqtyń qatýy ótken jylmen salystyrǵanda 55 paiyzǵa tómen ekeni anyqtaldy.
Naýryz aiynda oblystyń sý basý qaýpi bar 10 aýdanynda 20 myń sharshy metr aýmaqta muz jarý jumystaryn júrgizý josparlanǵan. Barlyq qajetti sharalar oryndalyp, qatań baqylaýǵa alynǵan.
