Foto: Akorda.kz
Qasym-Jomart Toqaev Qazaqstanǵa resmi saparmen kelgen Majarstan Premer-ministri Viktor Orbanmen shaǵyn quramda kelissóz júrgizdi, dep habarlaidy "Ult aqparat" Aqordanyń baspasóz qyzmetine silteme jasap.
Kelissóz aldynda «Aqorda» rezidentsiiasynda saltanatty túrde qarsy alý rásimi ótti. Qurmet qaraýylynyń bastyǵy Qazaqstan Prezidenti men Majarstan Premer-ministrine raport berdi. Eki eldiń memlekettik ánurandary oryndalǵannan keiin Qasym-Jomart Toqaev pen Viktor Orban shaǵyn quramda kezdesý ótetin zalǵa bardy.
Taraptar saiasi dialogty nyǵaitýǵa, saýda-ekonomikalyq yntymaqtastyq pen mádeni-gýmanitarlyq bailanystardy tereńdetýge basa mán bere otyryp, qazaq-majar qarym-qatynasynyń qazirgi jai-kúii men damý perspektivasyn jan-jaqty talqylady.
Memleket basshysy Qazaqstan men Majarstan arasyndaǵy qarym-qatynastardy nyǵaitýǵa eleýli úles qosqany úshin Viktor Orbanǵa rizashylyǵyn bildirdi.
– Qurmetti Premer-ministr myrza, eń aldymen, qazaq jerine qosh keldińiz! Sebebi Siz – qypshaqsyz. Bul derekti qazaqtar jaqsy biledi ári Sizdi syilaidy. Sondyqtan atamekenińizge keldińiz dep aitsaq, artyq bolmaityn shyǵar. Meniń shaqyrýymdy qabyl alyp, Qazaqstanǵa resmi saparmen kelgenińiz jáne Túrki memleketteri uiymynyń mereitoilyq sammitine qatysýǵa niet tanytqanyńyz úshin shynaiy rizashylyǵymdy bildiremin. Bul saparyńyz eki el arasyndaǵy yntymaqtastyqqa tyń serpin beretini sózsiz. Sondyqtan búgingi kelissózder nátijeli bolatynyna senimdimin, – dedi Qasym-Jomart Toqaev.
Óz kezeginde Viktor Orban Qazaqstanǵa shaqyrǵany jáne ózine, Majarstan delegatsiiasyna kórsetken qonaqjailyǵy úshin Qasym-Jomart Toqaevqa alǵys aitty. Ol eki el arasyndaǵy saiasi dialog pen ózara tiimdi seriktestiktiń deńgeiin joǵary baǵalady.
– Atajurtqa oralý árdaiym keremet. Majarlar Qazaqstanǵa kelgende erekshe sezimdi bastan keshedi. Óitkeni eki halyqty ǵasyrlar qoinaýynan bastaý alatyn tarihi tamyry bailanystyrady. Sońǵy on jylda biz yntymaqtastyǵymyzdy damytýǵa barynsha kúsh-jigerimizdi jumsadyq ári jaqsy nátijege qol jetkizdik. Ózińizben yntymaqtasa jumys isteý – men úshin zor mártebe. Majarstan árdaiym Qazaqstannyń senimdi strategiialyq seriktesi bolǵan. Aldaǵy ýaqytta da solai bola beredi. Majarstan men Qazaqstannyń bailanystary buryn-sońdy jetpegen deńgeige kóterildi. Sondai-aq yqpaldastyǵymyzdyń, ásirese ekonomikalyq qatynastarymyzdyń áleýeti zor, – dedi Viktor Orban.
