Eńbek jáne halyqty áleýmettik qorǵaý ministrligi ataýly áleýmettik kómekti tóleý jýyrda toqtatylady degen qaýesetti joqqa shyǵardy, dep habarlaidy "Ult aqparat" vedomstvonyń baspasóz qyzmetine silteme jasap.
Áleýmettik jeliler men messendjerlerde ataýly áleýmettik kómek jaqyn arada toqtatylady degen aqparat taraǵan. Ministrlik munyń jalǵan ekenin habarlady.
"Eńbek jáne halyqty áleýmettik qorǵaý ministrligi bul aqparatty resmi túrde joqqa shyǵarady. Atalǵan járdemaqy túri "Memlekettik ataýly áleýmettik kómek týraly" zańmen bekitilgen jáne ony joiý qoldanystaǵy zańnamaǵa ózgerister engizýdi talap etedi. Qazirgi tańda bul másele qarastyrylmaidy", - delingen habarlamada.
Baspasóz qyzmetiniń aqparatynsha, vedomstvo basqa memlekettik organdarmen jáne barlyq deńgeidegi ákimdikpen birlesip, turmysy tómen jáne balaly otbasylardy jańa formattaǵy ataýly áleýmettik kómekpen qamtýdyń barlyq uiymdastyrýshylyq, rásimdik, normativtik jáne qarjylyq máselesin sheshti.
7 maýsymdaǵy jaǵdai boiynsha respýblikada ataýly áleýmettik kómekpen 273 myń otbasy qamtylǵan.
