Sáýirde jeńil ónerkásipti damytýdyń keshendi jospary Úkimet qaraýyna engiziledi. Bul týraly búgin Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Jeńil ónerkásip boiynsha josparlanǵan naqty kólem indeksi – 105 paiyz. Toqyma ónimderin óndirý kólemi 6, onyń ishinde maqta-mata iirim-jibi 50, mata 14, kilem 19, kiim 11, teri 30,4 paiyz ulǵaiady. Biyl 5,4 mlrd teńgege iirim-jip, geotekstil, kiim jáne aiaq kiim shyǵaratyn 5 jobany iske asyrý josparlanyp otyr», - dedi óńdeý ónerkásibin damytý jaiynda baiandaǵan ministr.
Onyń atap ótýinshe, ministrlik Jeńil ónerkásipti damytýdyń 2025 jylǵa deiingi keshendi josparyn ázirleýge kiristi.
«Onda salany qoldaýǵa baǵyttylǵan júieli sharalar qarastyrylady. Qujat osy jyldyń sáýir aiynda Úkimettiń qaraýyna engiziledi», - dedi Beibit Atamqulov.
