Qazaqstan Prezidenti Qasym-Jomart Toqaev Indýstriia jáne infraqurylymdyq damý ministri Beibit Atamqulovty qabyldady, dep habarlaidy "Ult aqparat" Aqordaǵa silteme jasap.
Memleket basshysyna Indýstriia jáne infraqurylymdyq damý ministrliginiń biylǵy 7 aida atqarǵan jumysynyń qorytyndysy, sondai-aq, memlekettik baǵdarlamalardyń júzege asyrylý barysy týraly esep berildi.
Beibit Atamqulovtyń aitýynsha, pandemiia saldarynan týyndaǵan daǵdarys jaǵdaiyna qaramastan ministrlikke qarasty salalarda oń nátijelerge qol jetken. Ministr búginde «Nurly jer» baǵdarlamasy aiasynda 7 million sharshy metr turǵyn úi salynyp, 61,3 myń otbasynyń turmystyq jaǵdaiy jaqsarǵanyn jetkizdi. Sonymen qatar «Nurly jol» baǵdarlamasy boiynsha respýblikalyq jáne jergilikti mańyzy bar 9,8 myń shaqyrym joldyń qurylysy jáne qaita jóndeý jumystary júrgizilip jatyr.
Budan bólek jyl sońyna deiin Indýstriialandyrý kartasyn júzege asyrý boiynsha elimizdiń barlyq óńirlerinde 160 jobany iske qosý josparlanyp otyr.
Kezdesý sońynda Prezident óńdeý ónerkásibin odan ári yntalandyrýǵa jáne ishki naryqty tolyq qamtý maqsatynda óńdelgen ónimderdiń úlesin arttyrýǵa qatysty birqatar tapsyrma berdi. Qasym-Jomart Toqaev biyl paidalanýǵa beriledi dep josparlanǵan turǵyn úilerdi ýaqytynda tabystaýdyń mańyzdy áleýmettik mindet ekenin aitty. Sondai-aq kólik-tranzit infraqurylymyn jańǵyrtý jumystaryn jalǵastyrý qajettigin atap ótti.
