Qazaqstan Respýblikasynyń Syrtqy ister ministri Beibit Atamqulov ózbek tarapynyń bastamasymen Ózbekstan Respýblikasynyń Syrtqy ister ministri Abdýlaziz Kamilovpen telefon arqyly sóilesti. Bul týraly SIM baspasóz qyzmeti málimdedi.
Eki eldiń syrtqy saiasi vedomstvolarynyń basshylary ekijaqty jáne kópjaqty yntymaqtastyqtyń keń aýqymdy máselelerin, sondai-aq Ortalyq Aziia elderi basshylarynyń ekinshi jumys (konsýltativtik) kezdesýine daiyndyq jumystaryn talqylady.
Ózbek tarapy eki baýyrlas halyqtar arasyndaǵy rýhani ortaqtyq pen dostyqty odan ári nyǵaitýǵa úlken úles qosqan Qazaqstandaǵy Ózbekstan jylyn ótkizýge qolǵabys kórsetkeni úshin qazaqstandyq tarapqa alǵysyn bildirdi. Sonymen qatar, Ózbekstan SIM basshysy 2019 jyly Ózbekstandaǵy Qazaqstan jyly aiasyndaǵy is-sharalardy ótkizýde qajetti kómek kórsetýge daiyn ekendigine sendirdi.
A. Kamilov Qazaqstan Respýblikasynyń Syrtqy ister ministri B. Atamqulovty jańa laýazymǵa taǵaiyndalýymen quttyqtap, kez-kelgen qolaily ýaqytta Tashkentke resmi saparmen kelip ketýge shaqyrdy.
Sondai-aq, Ministr B. Atamqulov Tájikstan Respýblikasynyń Syrtqy ister ministri Sirodjiddin Mýhriddinmen telefon arqyly sóilesti.
Taraptar qazaqstan-tájik qarym-qatynastarynyń qazirgi jaǵdaiy men perspektivalaryn, sonymen qatar Tájikstandaǵy AÓSShK besinshi sammitin ótkizý máselelerin talqylady.
Tájikstan SIM basshysy B. Atamqulovty Syrtqy ister ministri laýazymyna taǵaiyndalýymen quttyqtap, joǵary qyzmet ornynda tabystar tiledi.
