«Atameken» ulttyq kásipkerler palatasy basqarma tóraǵasynyń birinshi orynbasary Nariman Ábilshaiyqov el aýmaǵynda kásipkerlik negizderine oqytý barysy jaiynda baiandady, dep habarlaidy QazAqparat.
«2017-2020 jyldary «Bastaý Biznes» jobasy boiynsha 151 528 jumyssyz jáne ózin-ózi jumyspen qamtyǵandar kásipkerlik negizderine oqytyldy. Oqytylǵandardyń qatarynan 40 myńnan astam joba iske qosyldy. 4 jyl ishinde olar el aýmaǵynda 60 myńnan astam jumys ornyn ashty», - dedi N. Ábilshaiyqov Ortalyq kommýnikatsiialar qyzmetinde.
Onyń aitýynsha, biyl «Bastaý Biznes» jobasy boiynsha 30 myńnan astam adamdy oqýty josparlanǵan. 2021 jyly «Jumyspen qamtýdyń 2020-2021 jyldarǵa arnalǵan jol kartasy» baǵdarlamasy aiasynda «Bastaý Biznes» qatysýshylarynyń jobalaryn qarjylandyrý úshin 22,5 mlrd teńge bólindi.
Óz kezeginde «Atameken» UKP-nyń Mikroqarjylandyrý jáne jobalardy súiemeldeý departamenti direktorynyń orynbasary Rinat Kemeshov «Atameken» mikroqarjylyq uiymdardy el aýmaǵynda ashqanyn eske saldy. Biylǵy 15 shildeden bastap mikroqarjylandyrýǵa ótinimder qabyldaý bastaldy. Óńirlerde jańadan bastaǵan kásipkerlerden jalpy somasy 3,5 mlrd teńgege 600-den astam ótinim qabyldandy.
«Aýyldyq jerlerde 7 mln teńgege deiin nesie bere alamyz. Qalalyq aýmaqtarda 18 mln teńgege deiin, sondai-aq Shymkent, Aqtaý, Atyraý qalalarynda 23 mln teńgege deiin nesieni qarastyryp otyrmyz. Onyń sharttaryna toqtalsaq, 6 paiyzdyq jyldyq mólsherleme eskerilgen. Mikrokredit merzimi – 5 jylǵa deiin, al mal sharýashylyǵy salasyndaǵy jobalar úshin mikronesie merzimi 7 jylǵa deiin qarastyrylǵan. Bul jumys óte jaýapkershilikti talap etedi: biz bilgir mamandar komandasyn qurdyq, ozyq tájiribeni qabyldadyq, onyń ishinde adami faktordy barynsha joiýǵa tyrystyq», - dedi ol.
