«Atameken» QR UKP Basqarma tóraǵasy Abylai Myrzahmetov koronavirýs pandemiiasy men munai baǵasynyń tómendeýine bailanysty kásipkerlerge resmi málimdeme jasady. Onyń aitýynsha, Qazaqstan Úkimeti koronavirýstan qorǵaný úshin barlyq sharalardy jasaýda, dep habarlaidy "Ult aqparat".
«Elimizde ekonomikaǵa, jalpy áleýmettik ahýalǵa qiyndyq ákelgen eki jaǵdai bolyp otyr. Onyń biri koronavirýs pandemiiasy bolsa, ekinshisi – sońǵy aptadaǵy negizgi eksport kózderiniń biri bolǵan munai baǵasynyń quldyraýy. Osynyń bári jalpy ekonomikamyzǵa, onyń ishinde shaǵyn jáne orta biznes kásipkerlerine úlken syn bolyp otyr. Memleket basshysy barlyq jaǵdaidy baqylaýda ustap otyr. Kúndelikti Úkimet tarapyna da, jaýapty ministrlikterge tapsyrma berip jatyr. Biz de atsalysyp, kúndelikti Úkimette ótetin barlyq pikir almasýǵa qatysyp júrmiz», - dep atap ótti Basqarma tóraǵasy arnaiy uiymdastyrylǵan onlain-brifingide.
Ulttyq palata atalǵan oqiǵalarǵa bailanysty kásipkerlerdi koll-ortalyqqa habarlasýǵa jáne saýalnamaǵa qatysýǵa shaqyrǵan.
«Biz de ózimizdiń shuǵyl áreket etetin shtabymyzdy qurdyq. Negizgi maqsatymyz – kásipkerlermen tikelei bailanysta bolyp jáne keri bailanys ornatý. Onyń úsh kanaly bar. Birinshisi – kásipkerler koll-ortalyqqa qońyraý shalyp, qandai kásippen ainalysatynyn, eki másele boiynsha qandai qiyndyqqa tap bolǵanyn aita alady. Nemese poshta arqyly on shaqty suraqqa jaýap jiberýge bolady. Al 2-3 myń jumysshysy bar úlken kásiporyndarǵa ózimiz tikelei habarlasamyz. Olarǵa arnalǵan anketanyń suraqtary kóp, óitkeni úlken kompaniialardyń ainalymdary da, nesie kólemi de úlken», - deidi A. Myrzahmetov.
Ulttyq palataǵa bir kúnde myńnan astam kásipker habarlasqan. Olardyń 30 paiyzy – orta biznes ókilderi, 60 paiyzǵa jýyǵy – shaǵyn biznes ókilderi, 27 paiyzy – mikrobiznes ieleri.
«Olardyń 40 paiyzy óndiris salasynda jumys istese, 65 paiyzy koronavirýsqa bailanysty kóp shyǵynǵa ushyrap jatqan saýda, qyzmet kórsetý salasynyń ókilderi. Olar koronavirýsqa bailanysty karantinniń keri áseri týraly, sol boiynsha qandai kómek bolatynyn, qandai sharalar qoldanylatynyn surap otyr. Palataǵa habarlasqan kásipkerlerge rizashylyq bildiremiz. Olar óz qiynshylyǵyn aityp qana qoimai, paidaly usynystaryn da aityp otyr. Jalpy koronavirýsqa bailanysty barlyq sharýashylyq qarym-qatynastar buzyldy. Barlyq memlekette eksport, import toqtatyldy. Osy jaǵdaida ózimizdiń aýyl sharýashylyǵymyzdy, tamaq salasyn damytýymyz kerek. Kóptegen kásipkerler dúrbeleńge salynbaýǵa, kerisinshe bizden buryn koronavirýsqa tap bolǵan elderdiń tájiribesin muqiiat qaraýdy usyndy. Barlyq usynystar, máseleler, málimetter kelesi seisenbide Úkimet otyrysynda jariialanady», - dedi Abylai Myrzahmetov.
Onyń aitýynsha, Qazaqstanda 1,2 mln-ǵa jýyq kásipkerlik sýbektisi jumys isteidi.
«Barlyq kásipkerge habarlasý qiynǵa soǵady. Sondyqtan, palatanyń biryńǵai 1432 nómirine elimizdiń kez kelgen núktesinen habarlasýǵa bolady. Ázirge 5 operator jumys istep jatyr, qajet bolsa, olardyń sanyn kóbeitemiz. Bul jerde esh salaǵa basymdyq bermeimiz. Kez kelgen otandyq kásipker palatǵa habarlasyp, qandai máselelerge tap bolǵanyn aita alady», - dedi A. Myrzahmetov.
