«Atameken» UKP Tóraǵasynyń mindetin atqarýshy Raiymbek Batalov eldegi dizel tapshylyǵyn sheshý jolyn usyndy, dep habarlaidy QazAqparat.
«Qazirgi tańda sharýalar dizeldiń qymbattaýyna alańdaýly. Tek olar emes, jalpy halyq pen biznes te osy otyn túrine táýeldi ekeni belgili. Bul máseleni júieli ári kezeń-kezeńimen sheshý kerek dep oilaimyz. Búginde elimizde tek 3 iri munai óńdeý zaýyty bar. Sondai-aq, birneshe shaǵyn kásiporyn jumys isteidi. Biz únemi ishki naryqqa saraptama jasap otyramyz. Onyń nátijesine bailanysty máseleni sheshý joldaryn usynamyz. Qazirgi tańdaǵy dizel tapshylyǵyn sheshý maqsatynda Qazaqstanda munai óńdeýmen ainalysatyn bólek, iri zaýyt salý kerek dep esepteimiz», - dedi Raiymbek Batalov.
Sondai-aq, kásipkerler palatasynyń ókilderi sharýalardyń suranysy negizinde elde agrobank ashý usynysy qarastyrylyp jatqanyn jetkizdi.
«Sharýalarǵa yńǵaily bolýy úshin agrobank qurýdy usyndyq. Bul búgingidei biýrokratiialyq júie arqyly rásimdeletin nesie bolmaidy. Qazir kásibi úshin nesie alatyn biznes iesi 35 qujat daiyndaýy qajet. Mundai júie bizge kerek emes. Al, agrobank qarajat qajet bolǵan fermerge barynsha jeńildetilgen tártipte qarjy usynatyn bolýy tiis. Bul bastamany Memleket basshyna da aittyq», - dep usynysymen bólisti «Atameken» UKP Agroónerkásip kesheni komitetiniń tóraǵasy Jigýli Dairabaev.
Onyń aitýynsha, búginde mundai bank kórshiles Reseide bar. Aldaǵy ýaqytta bank qurý sheshimi qabyldansa, onda ony jasaqtaýda atalǵan eldiń tájiribesin negizge alý josparlanǵan.
Aita ketsek, keshe Úkimettiń keńeitilgen otyrysynda Memleket basshysy Qasym-Jomart Toqaev sharýa qojalyqtary men iri saýda jelileriniń bailanysyn nyǵaitýdy tapsyrdy.
