«Atameken» ulttyq kásipkerler palatasy indýstriialyq sertifikat berilmei qalǵan múgedekter uiymynyń shaǵymyna jaýap berdi, dep habarlaidy "Ult aqparat".
«Atameken» múgedekter uiymyna 2019 jyldyń sáýir aiynan bastap indýstriialyq sertifikat berip keledi. Sertifikat berý tájiribesine sáikes, múgedekter uiymynyń óndiristik jai-kúiine baǵa berý úshin spetsifikalyq salalyq talaptardyń bolmaýyna bailanysty kemshilikter anyqtaldy. «Atameken» UKP múgedekter uiymyna shyǵyp, óndirýshi múgedekter uiymynyń oilaryn bir arnaǵa toǵystyryp, salalyq talaptardy ázirleý kerektigin usynǵan edi. Bul rette palata býhgalterlik, zańgerlik jáne salyqtyq keńesterdiń bárin de tegin júrgizýge ázir», - delingen palatanyń habarlamasynda.
Sonymen birge, palatanyń habarlaýynsha, kadrlardy ázirleý, arnaiy mamandyq standarttaryn bekitý, jumysqa ornalastyrý turǵysynda jumystar jalǵasa beredi.
«Qazirgi ýaqytta mundai kómek tolyqqandy kórsetilip jatyr. Alaida qaýymdastyqtardyń bytyrańqylyǵyn esepke alsaq, mundai kómek múgedekter uiymynyń bárin de qamti almaityny belgili boldy. Sonymen qatar, múgedekter uiymynyń biryńǵai memlekettik reestri joq. Olardy biriktiretin qaýymdastyq ta qurylmaǵan. Osyǵan bailanysty shekteitin normalarǵa jol bermeý úshin «Atameken» UKP indýstriialyq sertifikatty berý boiynsha qoldanystaǵy erejege ózgeristerdi engizdi. Bul rette tiisti talaptar ázirlengenshe múgedekter uiymy indýstriialyq sertifikat beriletin uiymdardyń qatarynan shyǵarylady», - dep habarlady «Atamekennen».
8 aidyń ishinde indýstriialyq sertifikat 238 uiymǵa berilgen. Olardyń 43-i múgedekter uiymy. Shaǵymdardy taldaýdyń arqasynda aryzdardyń kóbi jihaz jáne jeńil ónerkásip salasynan kelip jatqany anyqtalǵan.
«Bul degenińiz múgedekter uiymynyń memlekettik satyp alýdan alynyp tastalatynyn bildirmeidi. Zań boiynsha memlekettik satyp alýdy júrgizgen kezde basymdyq eń aldymen múgedekter uiymyna beriledi», - delingen habarlamada.
