Májilis Tóraǵasy Nurlan Nyǵmatýlin Almazbek Atambaevtyń aitqan sózderine pikir bildirdi, dep habarlaidy "Ult aqparat" QR Parlamenti palatasynyń baspasóz qyzmetine silteme jasap.
Onyń aitýynsha, Qazaqstan Prezidenti Nursultan Nazarbaev Qyrǵyzstan halqyn ózgelerdiń bárinen artyq qoldap, kómektesip jatyr.
«Qyrǵyzstan halqynyń da Qazaqstan kóshbasshysyna jyly lebizben jáne rizashylyqpen qaraitynyn bilemin. Sondyqtan, Atambaevtyń osyndai «bos», popýlistik jáne jaýapsyz sózderi bizdiń halyqtardyń baýyrlastyq qatynasyna syzat túsirmeýi kerek», - dep málimdedi N.Nyǵmatýlin.
Spiker sondai-aq Atambaevtyń basshylyq etken jyldarynda eshqandai nátijege qol jetkizbegenin atap ótti.
«Atambaevtyń ózine toqtalar bolsaq, óziniń prezidenttik etken jyldary ekonomikada da, saiasatta da eshqandai nátije kórsete almaǵany barshaǵa aian. Endi, ketip bara jatyp óziniń saiasi, sondai-aq ishki mádenietiniń múldem joq ekenin dáleldedi», - dedi Májilis Tóraǵasy.
