Qyrǵyzstannyń burynǵy prezidenti Almazbek Atambaevty shuǵyl aýrýhanaǵa jatqyzý kerek. Bul týraly onyń advokaty Zamir Jooshev málimdedi, - dep habarlaidy Tengrinews.kz tilshisi 24.kg saityna silteme jasap.
Onyń aitýynsha, Atambaev infarkt alýy múmkin, burynǵy aýrýlary da asqynyp ketken. Atap aitqanda, arqadaǵy aýyrsynýy kúsheie túsken. Alaida bir ai buryn taǵaiyndaǵan sot-meditsinalyq saraptama áli aiaqtalmaǵan.
Advokattyń sózinshe, 148 paraq meditsinalyq tarihynyń kóshirmesi sýdialarǵa berilgen. Ol saraptama taǵaiyndalǵanyn atap ótti.
"Almazbek Atambaev keshendi emdeýge jatqyzylýy tiis. Ol ony koloniiada ala almaidy. Biz ony aýrýhanaǵa jatqyzý úshin sanktsiiany úiqamaqqa ózgertýge birneshe ret ótinish jazǵanbyz. Biraq kelisim bermei jatyr", - dedi Zamir Jooshev.
Eske salaiyq, Almazbek Atambaevqa qatysty birneshe qylmystyq is qozǵaldy, onyń ishinde 2019 jylǵy 7-8 tamyzda bolǵan Qoi-Tash aýylyndaǵy tártipsizdikter, sybailas jemqorlyq derekteri jáne qylmystyq kiristerdi zańdastyrý isteri bar. Qańtarda Qyrǵyzstannyń eks-prezidenti tergeý izoliatorynan koloniiaǵa aýystyrylǵan.
