Qyrǵyzstannyń burynǵy prezidenti Almazbek Atambaevtyń áieli Raisa Atambaevaǵa qarsy qylmystyq is qozǵaldy, dep habarlaidy Azattyqtyń Qyrǵyz qyzmeti.
Bul is prezident apparatynyń sot reformasy jáne zańdylyq bóliminiń burynǵy meńgerýshisi Manas Arabaevtyń isi aiasynda qozǵalǵan. Bul týraly jýrnalisterge Raisa Atambaevanyń ózi aitqan.
"Arabaevtyń isi aiasynda búginnen bastap maǵan qarsy qylmystyq is qozǵalǵanyn jańa ǵana bildim. Men sýdialardyń isine eshqashan aralaspaǵanymdy aitqym keledi, saiasat las is ekenin biletinmin, sondyqtan oǵan aralaspaýǵa tyrystym. Men tipti bir de bir sýdiany tanymaimyn" dep málimdegen Atambaeva.
Qyrǵyzstan bas prokýratýrasy Raisa Atambaevaǵa qarsy is qozǵalǵany týraly aqparatty rastady. Is materialdary qylmystar men zań buzýshylyqtardyń biryńǵai tizimine tirkelgen.
Manas Arabaev 2 maýsymda ustalyp, ústinen "Jemqorlyq" baby boiynsha is qozǵalǵan. Qyrǵyzstan memlekettik ulttyq qaýipsizdik komitetiniń málimetinshe, ol qyzmet laýazymyn sheteldik investorlardyń kásipkerlik nysandaryn reiderlik jolmen tartyp alǵan jekelegen qylmystyq toptardyń múddesine teris paidalanǵan degen kúdikke ilingen.
2 shildede "Ala-Too 24" telearnasy efirinen kórsetilgen baǵdarlamada sheteldik investorlardyń dúnie-múlkin tartyp alýǵa burynǵy prezidenttiń zaiyby Raisa Atambaevanyń qatysy bar degen aqparat aityldy. Telearna siýjetinde ol jaiynda Manas Arabaevtyń tergeý organdaryna kýálik bergeni kórsetilgen.
5 shildede Bishkektiń Birinshi mai aýdandyq sotynyń sheshimi boiynsha, Manas Arabaev tergeý abaqtysynan úiqamaqqa aýystyrylǵan.
