Qyrǵyzstannyń burynǵy prezidenti Almazbek Atambaevty ustaý operatsiiasy kezinde Koi-Tash aýylyndaǵy eks-prezident úiinde Atambaevpen kelissóz júrgizgen Ishki ister ministriniń orynbasary Kýrsan Asanov qyzmetinen bosatyldy.
Ministrlik málimdeýinshe,"7-8 tamyz kúnderi bolǵan operatsiia kezinde tártipsizdikke jol bermeý mindeti júktelgen" Asanovtyń ústinen júrgizilgen qyzmettik tekserý qorytyndysyna sáikes, ministr orynbasary "qyrǵyz militsiiasynyń múddesin satyp, senimdi aqtamaǵan".
Asanovtyń ózi áleýmettik jelide Koi-Tashtaǵy oqiǵada qiyn jaǵdaiǵa tap bolǵanyn jazdy. "Ishki ister ministrliginiń jeke quramynyń arqasynda qiyndyqty jeńdik. Óz qyzmetimdi adal atqardym dep esepteimin. Jeke múddemdi memleketten joǵary qoimadym. Eldiń aldynda arym da abyroiym da taza" dep jazdy ol.
Atambaev 8 tamyzda jalǵasqan operatsiia kezinde óz erkimen bilikke berildi. Oǵan jemqorlyq aiyby taǵylyp, eks-prezident 26 tamyzǵa deiin qamaýǵa alyndy. Qazir onyń isi tergelip jatyr.
13 tamyzda prokýratýra burynǵy prezidentke taǵy birneshe aiyp taqty. "Atambaevqa tártipsizdik uiymdastyrý, zańsyz qarý ainalymy, tergeýge kedergi keltirý, adamdardy kepilge alý, adam óltirý, adam óltirýge talpynys jasaý siiaqty jeti qylmystyq aiyp taǵyldy" dedi bas prokýror.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady. Úsh ret shaqyrtý jibergenimen tergeýge barmaǵan Atambaevty ministrlik arnaiy operatsiia júrgizip, kúshtep ákelýdi tapsyrǵan.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitqan. Bishkek bul aiyptardyń saiasi astary bar degenmen kelispeidi.
Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
