Foto: 24.kg
Almazbek Atambaev Qyrǵyzstannyń eks-prezidentterimen kezdesýi jaily aitty, - dep habarlaidy Tengrinews.kz saity.
Atambaevtyń aitýynsha, bul oqiǵa ol úshin kútpegen jaǵdai bolǵan, óitkeni ol tek qazirgi memleket basshysy Sadyr Japarovty kóremin dep oilaǵan.
"Iá, eksterdiń (burynǵy prezidentter - esk.) kezdesýi boldy. Iá, men onda tap boldym. Olai deitinimniń sebebi, bul kezdesýge eks-prezidentter qatysatyny týraly maǵan habarlanbady. Meni prezident Sadyr Japarov jáne Qamshybek Tashievpen kezdesýge, erkin adamdardai teń dárejede sóilesip, eski renishterdi umytýǵa shaqyrǵany aityldy.
Jaqsylyǵy esimde, sondyqtan bas tarta almadym jáne tipti Ispaniia elshisimen viza týraly aldyn ala josparlanǵan kezdesýden bas tarttym. Ózderińiz biletindei, premer-ministr Pedro Sanches meni emdelýge shaqyrǵan bolatyn, ol úshin oǵan kóp raqmet", - dedi ol.
Atambaev eldiń qazirgi prezidenti óziniń burynǵy áriptesterin birlikke shaqyrǵanyn, olardyń árqaisynyń qoldaýshylary kóp ekenin rastady.
"Men de eldiń tynyshtyǵy men birligin jaqtaimyn. Bul týraly aittym jáne de prezident Japarovtyń izgi nietin joǵary baǵalaimyn. Biraq kezdesý sońynda "aǵylshynsha" eshkimmen qoshtaspai ketýge týra kelgen jaǵdai týyndady. Aldaǵy ýaqytta qajettilik týyndasa, árine, egjei-tegjeili aityp beremin.
Elimizde beibitshilik pen birlik ornatý jáne Bakievterdiń Qyrǵyzstanǵa oralýy eki úlken aiyrmashylyq. Biriktirý múldem basqa nátije beredi. Tym kóp qan tógildi, kóbin umytýǵa bolmaidy jáne umytylmaidy. Árine, kináliler jaýapqa tartylýy kerek. Birinshi, qaza bolǵandardyń týystary keshirim jasaýy kerek. Prezident Sadyr Japarov meni túsinip, durys sheshim qabyldaidy dep senemin", - dep túiindedi ol.
Eske salaiyq, buǵan deiin Qyrǵyzstannyń qazirgi prezidenti Sadyr Japarov barlyq eks-prezidentterdi bir ústel basyna jinaǵan bolatyn. Kezdesýge Atambaevtan bólek, Asqar Aqaev, Qurmanbek Bakiev, Roza Otynbaeva jáne Sooronbai Jeenbekov qatysty.
