Qyrǵyzstannyń burynǵy prezidenti Almazbek Atambaev tóńkeris jasamaqshy bolǵan. Bul týraly Qyrǵyzstannyń memlekettik ulttyq qaýipsizdik komitetiniń tóraǵasy Orozbek Opýmbaev baspasóz máslihatynda málim etti, dep habarlaidy QazAqparat Kabar agenttigine silteme jasap.
Ol Almazbek Atambaevtyń adamdarǵa 1-3 myń som aralyǵynda aqsha tólep, úiiniń aldyna ádeii jinaǵanyn atap ótti.
Qyrǵyz Respýblikasynyń MUQK basshysy operatsiiaǵa «Alfa» arnaiy jasaqtyń jiberilgenin túsindirdi.
Onyń aitýynsha, ereje boiynsha «Alfa» antiterroristik áreketterde tartylady. Biraq, ol qosymshaǵa sáikes, keibir jaǵdaida arnaiy jasaqtyń jumyldyrylatynyn atap ótti. MUQK basshysy «Alfa» arnaiy jasaǵynyń esirtki tasýshylar men uiymdasqan qylmystyq topty ustaý kezindegi operatsiiasyn mysal retinde keltirdi.
«Arnaiy jasaq jedel ýákilderdi zorlyq áreketterden qorǵaýy kerek edi. Sondyqtan, olardyń sany az boldy. Májbúrlep alyp kelýdiń bes nusqasy qarastyryldy. Oryn alǵan jaǵdai – bir nusqa edi jáne ol eń tiimdisi bolatyn. Sebebi, kez kelgen áreket – arnaiy jasaq, IIM jáne MUQK jumysy týraly aqparat Atambaevtyń shtabyna jasyryn jetkizildi. Segizbaevtyń (Abdil Segizbaev, burynǵy MUQK basshysy) jáne Israilovtyń (Ýlan Israilov, burynǵy ishki ister ministri) organdaǵy burynǵy jáne qazirgi adamdar osy úshin aqsha alyp otyrdy. Barlyǵyn shtabqa jetkizip otyrdy, sondyqtan kenetten shabýyldaý týraly sheshim qabyldandy. Atambaev 500 adam jinady. Olar balalar, áielder jáne qariialar edi. Oǵan bilikti aiyptaý úshin qan tógý kerek boldy, ol memlekettik tóńkeris jasaityn edi», - dedi ol.
Opýmbaev atap ótkendei, Atambaev esikteri men terezelerine temir qorshaý ornatyp, úiin qorǵaýǵa tolyqtai daiyndalǵan.
«Atambaevtyń úiinen Dragýnov snaiperlik vintovkasy, árqaisysynyń ishinde 480 patrony bar 2 temir jáshik tabylǵan. Budan bólek, 4-5 vintovka, tapansha men taǵy basqa qarý-jaraqtar boldy», - dedi ol.
7 tamyz kúni keshke Qoi-Tashta eldiń burynǵy prezidenti Almazbek Atambaevtyń úiinde A.Batýkaevtyń isi boiynsha tergeý organdaryna kúshtep ákelý kezinde qaýipsizdik kúshteri ókilderi men burynǵy prezidentti qoldaýshylar arasynda qaqtyǵys boldy.
Sonyń saldarynan «Alfa» MUQK arnaiy bólimshesi basshysynyń orynbasary Úsen Niiazbekov kóz jumyp, 40-tan astam adam jaralandy.
8 tamyz kúni quqyq qorgaý organdary Atambaevty Qoi-Tash aýylyndaǵy úiinde qolǵa túsirip, 26 tamyzǵa deiin UQK Tergeý izoliatoryna jiberildi.
Qoi-Tashta oryn alǵan jaǵdaiǵa, arnai jasaq qyzmetkeriniń kóz jumýyna jáne quqyq qorǵaý organdary qyzmetkerleriniń jaraqattanýyna bailanysty sotqa deiingi is júrgizý bastaldy.
