Foto: Ǵabit Músirepov atyndaǵy Qazaq memlekettik akademiialyq teatry
Qazaqstannyń eńbek sińirgen artisi, aktrisa Kúlásh Qajyǵalieva qaitys boldy. Bul týraly Ult.kz Ǵabit Músirepov atyndaǵy Qazaq memlekettik akademiialyq teatrynyń baspasóz qyzmetine silteme jasap habarlaidy.
Qaiǵyly habardy estirtý teatrdyń Facebook-tegi paraqshasynda jariialandy.
"QR Eńbek sińirgen artisi, Eren eńbegi úshin jáne «Eńbek ardageri» medalderiniń iegeri, teatrymyzdyń artisi Qajyǵalieva Kúlásh Sopqanqyzy ómirden ótti", - delingen habarlamada.
Kúliash Qajyǵalieva óziniń eńbek jolyn 1969 jyldan bastaǵan. Ol "Meniń atym Qoja" spektaklinde Janar rólin, "Qyzyl suńqarlar" qoiylymynda Marýar rólin, "Qorqyttyń kóri" spektaklinde Qamqa shesheniń, Sh. Aitmatovtyń "Ystyqkól tragediiasy" qoiylymynda Kempir rólin, Á.Tarazidiń "Jaqsy adam" spektaklinde Balziianyń jáne A.P. Chehovtyń "Shaǵala" qoiylymynda Polina Andreevnanyń rólderin somdaǵan.
Teatrdyń resmi saityndaǵy málimet boiynsha, Kúlásh Qajyǵalieva 1942 jyly 9 maýsymda Almaty oblysy Aqjar aýylynda dúniege kelgen. 1961-1967 jyldary Qurmanǵazy atyndaǵy memlekettik óner institýtynda "Aktrisa" mamandyǵyn alǵan. 1967 jyly joldamamen Ǵabit Músirepov atyndaǵy Qazaq memlekettik akademiialyq teatryna aktrisa bolyp qabyldanǵan.
