QR Aqparat jáne qoǵamdyq damý ministri Dáýren Abaev «Habar» arnasyndaǵy «Ashyq dialog» baǵdarlamasynda Qazaqstandaǵy sinofobiia týraly pikir bildirdi, dep habarlaidy QazAqparat.
Baǵdarlama júrgizýshisi Qytaimen birlesken 55 kásiporynǵa narazylyqty eske salyp, qoǵamnyń nege qarsy ekenin surady.
«Joldaýda Prezident jerimizdiń sheteldikterge satylmaitynyn naqty aitty. Iaǵni, Memleket basshysy saiasi kepildik berdi. Munda barlyq joramaldy doǵarý kerek. Qytaimen birlesken 55 kásiporynǵa nege qarsy shyqqandaryn túsinbeimin. Búgin Premer-Ministrdiń orynbasary Jeńis Qasymbek brifing ótkizip, 20 myń jumys ornynyń 95% qazaqstandyqtarǵa beriletinin aitty. Jalpy Qytai investitsiiasy Qazaqstanǵa salynatyn investitsiialardyń 5% ǵana quraidy», - dedi ministr.
Onyń aitýynsha, álem elderi Qytai kapitalyna umtylady. Qytailyq investorlar Latyn Amerikasynda, Reseide, Eýropada, Afrikada, Taiaý Shyǵysta jumys isteidi.
«Bir kúni qytailyq kásiporyndar elimizden údere kóshse, olardyń ekonomikasyna sezilmeidi de. Al bizge edáýir baiqalatyn bolady. Aǵaiyndar, elge qyzmet etip otyrǵan azamattardyń barlyǵy nadan dep oilaisyzdar ma? Biz de - qazaq degen uly ulttyń urpaǵymyz. Ata-babamyzdyń súiegi jatqan jerdi shetelge satý degen sózdiń ózi aqylǵa syimaidy. Jer urpaqtan-urpaqqa amanat bolyp qala beredi. Aiqailap, ósek taratý - patriottyq emes», - dedi D. Abaev.
Ministrdiń pikirinshe, qoǵamda úlken arandatý júrip jatyr. Áleýmettik jelilerde maqsatty jalǵan aqparattar kóbeidi.
«Qazaqstanǵa aǵylyp kóship jatqandar, milliondaǵan gektar jerimizdiń satylýy týraly shyndyqqa janaspaityn materialdar shyǵýda. Bul qazaqstandyqtardy ońai sendirip, sinofobiia, rýsofobiia, amerikanofobiiany tańýǵa bolatynyn kórsetip otyr. Árbir aqparattyq shabýyl investitsiialyq jáne iskerlik ahýalǵa ǵana emes, elimizdiń týristik tartymdylyǵyna da nuqsan kelitredi», - dep óz sózin túiindedi Dáýren Abaev.
