Elorda mektepteriniń biriniń ata-analar chatynda vaktsina almaǵan ata-analardyń balalary mektepke kirgizilmeitini týraly aqparat tarady. Buǵan qatysty qalalyq Bilim basqarmasy túsinik berdi, dep habarlaidy "Ult aqparat".
«1 qyrkúiekten bastap balalar mektepke barady. Ata-anasy vaktsina almaǵan balalardy mektepke kirgizbeidi. Ata-analardyń bárin vaktsina alýǵa shaqyryńyzdar», - delingen WhatsApp arqyly taraǵan málimette.
Nur-Sultan qalasy Bilim basqarmasynyń baspasóz qyzmeti bul málimettiń feik ekenin málimdep otyr.
«Nur-Sultan qalasynda oqý jylyn dástúrli formatta bastaý josparlanýda. Ata-anasy vaktsinatsiia qabyldamaǵan bala 1 qyrkúiekte mektepke qabyldanbaidy degen sheshim shyqqan joq», - dep jaýap berdi vedomstvodan.
Eske salsaq, 11 tamyzda ótken Úkimet otyrysynda Premer-Ministri Asqar Mamin Bilim jáne ǵylym, Densaýlyq saqtaý ministrlikterine, óńirlerdiń ákimdikterine jańa oqý jylynyń dástúrli formatta bastalatyndyǵyna bailanysty birqatar tapsyrma bergen bolatyn.
1 qyrkúiekte saltanatty qońyraý soǵý sharasy tek 1-synyp oqýshylary úshin ǵana ótedi. Al 2-11 synyptar tikelei bekitilgen kabinetterge baryp, synyp saǵattaryna qatysady.
Barlyq bilim berý uiymdarynda qyzmetkerler men bilim alýshylar maska kiiýge mindetti.
Mektepterde qosymsha aýysymdar uiymdastyrylady, úzilister ýaqyty ár ýaqytqa belgilenip, «1 synyp - 1 kabinet» júiesi iske qosylady.
Al jańa oqý jylynda 1 oqýshydan koronavirýs shyqsa, búkil synyp qashyqtan oqytý formatyna kóshiriledi.
9 tamyzdaǵy jaǵdai boiynsha, bilim mekemelerindegi pedagogterdiń 93,1 paiyzy koronavirýsqa qarsy vaktsina alǵan.
