Almaty oblysy Raiymbek aýdany Narynqol aýylynda 6 oqýshyny kólikpen qaqqan jasóspirimniń áleýmettik jaǵdaiy, tártibi men oqý úlgerimi týraly muǵalimderi aityp berdi, dep habarlaidy Sputnik Qazaqstan tilshisi.
10-synyp oqýshysy aǵasynyń kóligin ruqsatsyz alyp ketken. Ol - týǵan aǵasynyń qamqorlyǵynda. Óitkeni 2011 jyly ákesinen, 2021 jyly anasynan aiyrylyp, jetim qalǵan.
"Aǵasy Raiymbek aýdandyq bilim bóliminde ádisker bolyp qyzmet etedi. Oqýshynyń esh oǵash qylyǵy bolǵan emes. Sportpen ainalysady, sabaqtaǵy úlgerimi de, tártibi de óte jaqsy oqýshy. Bul bir jazym bolyp tur", - deidi Telman Januzaqov atyndaǵy orta mekteptiń direktory Mútálip Stybekov.
Oqýshy tipti mektepishilik ózin-ózi basqarý komitetine sailaýǵa qatysqaly júrgen.
"Ózin-ózi basqarý komitetine usynylyp, jaqyn kúnderde sailaý ótedi dep josparlap júr edik. Sailaýǵa kandidatýrasyn ózi usyndy. Oqýshynyń boiynda jaqsy qasiet kóp, synyptastarymen, meili kimmen bolsyn, qarym-qatynasy óte jaqsy bala. Ata-anasynyń kenje uly. Marqum anasyn sondai qatty jaqsy kóretin, anasynyń da meiirimi bul balasyna erekshe edi", - deidi mektep direktory.
Anasy ómirden ótkende mektep psihologtary balamen jumys istegen. "Bala kúizeliske túspei, bolashaqqa umtylǵan jalyndap turǵan oqýshy" deidi muǵalimderi.
Eske sala keteiik, Narynqol aýylynda oqýshy kólikpen 6 jasóspirimdi qaǵyp ketti. Onyń beseýi jansaqtaý bóliminde jatyr. Qazirgi kúni oqiǵaǵa qatysty tergeý júrip jatyr.
