Aldaǵy ýaqytta ata-analar balabaqshany ózi tańdaityn bolady. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«6 jasqa deiingi balalardy balabaqshamen 100 paiyz qamtý máselesin iske asyrýdyń eki ereksheligi bar. Birinshiden, bul tapsyrmany memlekettik tapsyrys berý arqyly jekemenshik balabaqshanyń úlesin arttyrý esebinen oryndaimyz. Qysqa ýaqyttyń ishinde jekemenshik sektordy damytýdyń arqasynda ózgeris boldy. Qamtý paiyzy ósti. Ary qarai osy baǵytpen jumys istep, balalardy balabaqshamen qamtý máselesin sheshemiz»,- dedi ministr Úkimet úiinde ótken baspasóz máslihatynda.
Onyń aitýynsha, ekinshi erekshelik – vaýcherlik tetik.
«Vaýcherlik tetik degenimiz ne? Máselen, búginde ata-ana balasyynyń kezegi kelgennen keiin qai balabaqshaǵa baratynyn memleket kórsetip beredi. Endi munan keiin Memleket basshysynyń tapsyrmasy boiynsha vaýcherlik tetik qoldanylady. Iaǵni, ata-ana óziniń vaýcherin alyp, ózine unaǵan, tiimdi degen balabaqshany tańdaidy. Qazirgi ýaqytta oblys ne qalanyń, aýdannyń bilim bólimderi, basqarmalary konkýrs ótkizip, qai balabaqsha memleket tapsyrys alatyndyǵyn anyqtasa, endi ata-ana ózi tańdaidy. Bul eń aldymen básekelestikti arttyrady. Al básekelestik bolǵanda sapa jaqsarady. Sondyqtan bul óte mańyzdy tapsyrma», - dedi Ashat Aimaǵambetov.
