Sýret: Kazinform
Shymkentte qamqorlyǵyna jáne asyrap alǵan balalaryna qorlyq kórsetti degen emshige qatysty iske núkte qoiyldy, dep habarlaidy "Ult aqparat" Kazinform.kz-ke silteme jasap.
Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda Ý.Smanovqa qatysty Qylmystyq kodekstiń 140-babynyń 2-bóligi (Kámeletke tolmaǵan adamdy tárbieleý jónindegi mindetterdi oryndamaý), Qylmystyq kodekstiń 110-baby 2-bóliginiń 1,2-tarmaqtary (Qinaý) boiynsha sotqa deiingi tergep-tekserý organynyń meditsinalyq sipattaǵy májbúrleý sharalaryn qoldaný týraly ótinish hatymen kelip túsken qylmystyq isti qarady.
Sot-psihiatriialyq saraptamasynyń qorytyndysyna sáikes, Ý.Smanov sozylmaly jáne psihikalyq aýrýmen aýyrady jáne óz is-áreketterin jasaý kezinde es-tússiz jaǵdaida bolǵan. Iaǵni, Qylmystyq kodekstiń 16-babyna sáikes (Esi durys emestik) qoǵamǵa qaýipti is-áreketti jasaǵan ýaqytta esi durys emes kúide bolǵan, iaǵni sozylmaly psihikalyq aýrýy, psihikasynyń ýaqytsha buzylýy, aqyl-esiniń kemdigi nemese psihikasynyń ózge de dertke ushyraýy saldarynan óziniń áreketteriniń (áreketsizdiginiń) is júzindegi sipaty men qoǵamǵa qaýiptiligin uǵyna almaǵan nemese olarǵa ie bola almaǵan adam qylmystyq jaýapkershilikten bosatylady.
"U.Smanov Qylmystyq kodekstiń 16-babyna sáikes qylmystyq jaýapkershilikten bosatylsyn. Oǵan mamandandyrylǵan úlgidegi psihiatriialyq statsionarda májbúrlep emdeý taǵaiyndalsyn", - dedi kámeletke tolmaǵandardyń isteri jónindegi mamandandyrylǵan aýdanaralyq sot tóraǵasynyń mindetin atqarýshy Bolat Qarabaev.
Budan ózge jabyq sot otyrysynda Oqý-aǵartý ministrligine, Astana, Almaty jáne Shymkent qalalarynyń bilim basqarmalarynyń qorǵanshylyq jáne qamqorshylyq organdaryna, sondai-aq Shymkent qalalyq Politsiia departamentine balalardy psihikalyq aýrýmen aýyratyn adamnyń qamqorlyǵyna berý faktisi boiynsha jeke qaýly shyǵaryldy.
Qaýly zańdy kúshine engen joq.
Buǵan deiin Shymkentte jergilikti emshiniń 6 balany asyrap alyp, olarǵa it pen mysyqtyń etin bergenin, úsh jyldan beri azaptap kelgeni habarlanǵan.
