Azyq-túlik korporatsiiasynyń resýrstaryna 769,4 myń tonna kóleminde astyq jetkizýge kelisimshart jasaldy. Bul týraly búgin Úkimet otyrysynda QR Aýyl sharýashylyǵy ministri Erbol Qarashókeev aitty, dep habarlaidy QazAqparat.
«Memleket basshysynyń tapsyrmasy aiasynda biyl Azyq-túlik korporatsiiasy aýyl sharýashylyǵy ónimderin forvardtyq satyp alýdy júzege asyrdy. Sonyń arqasynda Azyq-túlik korporatsiiasynyń resýrstaryna 769,4 myń tonna kóleminde astyq jetkizýge kelisimshart jasaldy. Aýyl sharýashylyǵy taýaryn óndirýshilermen tolyqtai esep aiyrysý úshin Azyq-túlik korporatsiiasy bidai satyp alý baǵasyn 3-synypty bidai úshin sapasyna qarai 103-107 myń teńge aralyǵynda, 4-synypty bidai úshin 98 myń teńge, 2-synypty arpa úshin 87 myń teńge mólsherinde belgiledi.
Onyń atap ótýinshe, Azyq-túlik korporatsiiasynyń satyp alý baǵalary ishki naryqtaǵy aǵymdaǵy baǵalarǵa sáikes keledi. Bul fermerlerdiń shyǵyndaryn salanyń odan ári damýyn qamtamasyz etetin rentabeldilik deńgeiimen óteýge múmkindik beredi.
«Ádettegidei, Azyq-túlik korporatsiiasynyń satyp alý baǵasy kelisimsharttar jasasý kezinde baǵdar bolyp sanalady. Osylaisha ádil baǵa belgileý astyq baǵasynyń kúrt aýytqýyn boldyrmaýǵa múmkindik bermek», - dedi Erbol Qarashókeev.
