Astanada EKSPO-2017 halyqaralyq kórme qarsańynda TMD elderinde balamasy joq, sońǵy úlgide salynǵan «Nurly jol» jańa vokzaly paidalanýǵa beriledi, dep habarlaidy "Ult aqarat".
Joba aiasynda Astana temirjol teliminiń infraqurylymyn damytý men vokzal kesheni qurylysyn júrgizý jumystary atqarylady. Astana infraqurylymyn damytý arqyly júk jáne jolaýshylar aǵynyn ulǵaitý kózdeledi.
«Qazaqstan temir joly» UK» AQ baspasóz qyzmeti málim etkendei, qalanyń ishki temirjol nysandaryn damytý qurylysyna aldyńǵy qatarly innovatsiialyq tehnologiia paidalanylady.
Shýdan qorǵaityn qurylǵymen qaptalǵan temirjol estakadasy qalanyń kólik aǵynyna kedergi keltirmei, jolaýshylardy jańa temirjol vokzalyna jetkizedi.
Jańa vokzal táýligine 35 myń jolaýshyny ótkize alady. Al, qazirgi elordadadaǵy eski vokzal arqyly kúnine 12 myń jolaýshy ótýi tiis bolsa, onda is júzinde 18 myń jolaýshyǵa deiin kirip-shyǵady.
Jańa vozkal jobasyn saraptaý barysynda tartylǵan Buro Happold (Ulybritaniia), Tabanlioglu Architects (Túrkiia), Jamas (Germaniia) halyqaralyq sarapshylar komandasy vokzaldy temirjoldyń ústine konkors arqyly ornalastyrýdy qoldady.
Bul óz aldyna vokzal ǵimaratyn jasaýdaǵy sońǵy tásil ózindik noý-haý bolyp tabylady. «Vokzal-kópir jaǵalaýdan birtindep kóterilip, keńistikti tiimdi paidalanýdy maqsat etken.
Vokzaldyń qalanyń iskerlik ortalyǵyna jaqyn ornalasýy da óte qolaily. Ol arqyly qaladaǵy avtokóliktiń keptelisi azaiady.
Vokzal ǵimaratynyń aýmaǵy - 120 myń sharshy metr. Onda múmkindigi shekteýli jandarǵa arnalǵan taktildik joldar, Brail álipbiimen aqparatty tablo, arnaiy kassa qyzmet kórsetedi.
Negizgi kútý zalynan bólek álemdik talaptarǵa sai qonaqúilik bólmeler, qolaily saqtaý qoimalary, ana men bala bólmesi, meditsinalyq keńseler, fýdkorttar, meiramhanalar, 1500 oryndyq ishki jáne syrtqy parking qamtylǵan.
Ǵimarat qýat únemdegish liftilermen, eskalatorlarmen qamtylyp, jylý júieleri qysta aýany jylytsa, jazda salqyndatady.
Jańbyr sýyn jinap, ony qasbetti jýýǵa paidalanyp, jaqyn aýmaqty kógaldandyrýǵa jumsalady.
Jolaýshylardyń kezek kútip qalmaýyn boldyrmaý úshin kezekti basqarýdyń zamanaýi qondyrǵysy, biletti elektrondy satý júiesi, internetke shyǵý múmkindigi jasalady.
Jolaýshylardy tótenshe jaǵdailardan qorǵaý maqsatynda lańkestik oqiǵalardyń aldyn alýdyń keshendi múmkindigi jasalady. Onymen qosa, jolaýshylardy tekserip kirgizý qurylǵysy, beinebaqylaý júiesi ornatylady. Ǵimarattyń ishi-syrtynda qozǵalys tártibi táýlik boiy baqylanady.
Sondai-aq, jańa vokzal ashylǵan kezde 1300 adam jumyspen qamtylady.
15 mamyrda jalpy qurylys jumystary aiaqtalyp, 1-maýsymda vokzal kesheni infraqurylymynyń injenerlik-kommýnikatsiialyq jáne poiyz qozǵalysyn intellektýaldyq basqarý júiesi, jolaýshylarǵa qyzmet kórsetýi testilik synaqtan ótkiziledi.
Aita keteiik, «Nurly jol» vokzalyna alǵashqy poiyzdar 1-maýsymnan kirip, shyǵa bastaidy.
