Kórneki sýret: inform.kz
Elordada birneshe qoǵam qairatkerleri men jazýshylarǵa kóshe beriledi. Bul týraly qalalyq Tilderdi damytý jáne arhiv isteri basqarmasynyń basshysy Sáken Esirkep aitty, dep habarlaidy QazAqparat agenttigi.
«Búgin Astananyń keibir kóshelerine ataý berý jáne olardyń atyn ózgertý usynystaryn talqyǵa salamyz. Atap aitqanda, A-23 jobalyq kóshege Ekinshi dúniejúzilik soǵys jaýyngeri, maidanger jazýshy, bilikti jýrnalist Ásker Nábievtiń atyn berý, A-24 jobalyq kóshege – Qazaqstannyń memlekettik syilyǵynyń laýreaty Syrbai Máýlenovtyń atyn berý, E-12 jobalyq kóshege – qazaqtyń qaharman qyzy, Keńes odaǵynyń batyry Mánshúk Mámetovanyń esimin berý, E-20 jobalyq kóshege – áigili akademik, ǵalym, Ulttyq ǵylym akademiiasynyń akademigi Shapyq Shókinniń esimin berý, E-753 jobalyq kóshege – kórnekti memleket jáne qoǵam qairatkeri, tarihshy, dáriger, ǵalym, professor Sanjar Asfendiiarovtyń esimin berý, №187 jobalyq kóshege – balalar ádebietiniń kórnekti ókili, klassik jazýshy Berdibek Soqpaqtaevtyń atyn berý, №189 jobalyq kóshege – qazaq dalasynan shyǵyp, Mysyr elinde 17 jyl mámlúkterdi basqarǵan Beibarys Sultannyń esimin berý», - dedi Sáken Esirkep qalalyq máslihattyń kezekten tys sessiiasynda.
Sonymen birge №23-16 kóshe men Maǵjan Jumabaev dańǵylyn biriktirip, Maǵjan Jumabaev dańǵyly dep qaita ataý kózdelip otyr.
«Oń jaǵalaýdaǵy eski Mánshúk Mámetova kóshesine Ile ózeni boiyndaǵy 17-18 ǵasyrdaǵy ortaǵasyrlyq qalanyń aty «Qaramergen» degen atty usynyp otyrmyz. Buqar jyraý kóshesine iaǵni, Botanikalyq baqtan Mega Silkway saýda-oiyn-saýyq ortalyǵyna deiin jalǵasqan Saýran kóshesiniń qysqa bóligin Geidar Álievtiń esimimen ataý josparlanǵan», - dedi spkier.
Máslihat depýtattary bul usynysty tolyq qoldady.
