Elbasy Nursultan Nazarbaev Astanany gazdandyrý máselesin 1-1,5 jylda sheshýdi tapsyrdy, dep habarlaidy QazAqparat tilshisi.
QR Prezidenti Qyzylordadaǵy Qaraózekten Jezqazǵan, Qaraǵandy, Temirtaý, Astana arqyly magistraldy gaz qubyry salynatyn málim etti.
«Búginde respýblikadaǵy gazdandyrý deńgeii shamamen 50 protsentti quraidy. Batys pen ońtústiktegi 9 oblys gazben qamtamasyz etildi. Ortalyq jáne soltústik óńirler áli de gazsyz qalyp otyr. Osyǵan bailanysty men Qyzylorda oblysyndaǵy Qaraózek jerinen Jezqazǵan, Qaraǵandy, Temirtaý, Astana arqyly boiynsha magistraldy gaz qubyryn salýymyz kerek dep oiladym. Bul 2 mln 700 myń adamdy gazben qamtamasyz etýmen qatar, Arqanyń ekologiialyq ahýalyna jaqsy áser etetin bolady», - dedi Nursultan Nazarbaev QR Parlamenti palatalarynyń birlesken otyrysynda.
Prezidenttiń aitýynsha, gazdandyrý máselesi aldaǵy 1-1,5 jylda sheshilýi tiis jáne bul Astanadaǵy ziiandy qaldyqtardyń aýaǵa taralýyn edáýir azaitpaq.
«Biz tuńǵysh ret batystaǵy gazdy ońtústik arqyly Shymkent-Almatyǵa deiin jetkizdik. Múmkinshilik bar. Sondyqtan, bul máseleni sheshetin bolsaq, Astananyń ózinde ziiandy qaldyqtardyń aýaǵa taralýy 6 esege nemese 35 myń tonnaǵa azaiady. Saryarqanyń sary jeli bárin alyp ketedi degen oi bizde boldy. Degenmen, keiingi kezde kórip júrmiz. Qalada turǵynnyń jáne kóliktiń kóbeiýine bailanysty, eki JEO-ny qatar kómirmen jaqqan kezde qalanyń ústinde ylǵi tuman turatyn boldy. Odan ketýimiz kerek. Qala ákimshiligi de jumys istep jatyr. Eger myna máseleni sheshsek, jolshybai qansha adamǵa jeńildik bolady. Muny bir-bir jarym jyl ishinde sheshý kerek», - dep atap ótti Prezident.
Elbasy Qaraózek - Jezqazǵan - Qaraǵandy - Temirtaý - Astana baǵytyndaǵy magistraldy gaz qubyry arqyly elimizdiń soltústigindegi Pavlodar, Petropavl, Kókshetaý qalalaryn da gazben qamtamasyz etý qarastyrylatynyn jetkizdi. Bul úshin jobaǵa Úkimet halyqaralyq qarjy institýttarynan tiisti qarjylandyrý tartýy tiis.
