Astanalyqtar koronavirýsqa qarsy Pfizer vaktsinasyn saldyra bastady, habarlaidy QazAqparat tilshisi.
«Meniń jasym 17-de, L. Gýmilev atyndaǵy Eýraziia ýniversitetiniń 1-kýrs stýdentimin. Vaktsina alǵan sebebim - aldymen ózimniń qaýipsizdigimdi oiladym, ekinshiden qoǵam qaýipsizdigi úshin. Ekpe almas buryn oǵan qatysty aqparattarmen tanystym, onyń ishinde Pfizer týraly da oqyp, bildim. Qazir ózimdi jaqsy sezinip turmyn, ázirge eshqandai keri áser baiqalmaidy», - dedi Tórejan Tursyn.
Astanalyq jasópirim Pfizer ekpesin №8 qalalyq emhanada saldyrdy.
«Ata-anam vaktsina alýyma qarsy bolǵan joq, kerisinshe alǵanymdy qalady. Ózim koronavirýspen aýyrǵam, biraq jeńil túrde ótti. Jalpy vaktsinaǵa qatysty túrli alyp-qashpa áńgimeler bar, osy oraida aitarym, bastysy ata-anamnyń ruqsatyn aldym, qalǵany mańyzdy emes. Oqý ornynda da eshqandai vaktsina alýǵa úgitteý sharasy ótkizilgen joq. Tek bizden kámeletke tolǵan-tolmaǵanymyz týraly surady», - deidi ol.
Odan bólek, stýdent vaktsina almas buryn dárigerler oǵan qatysty aqparatty usynǵanyn aitty.
«Balama vaktsina saldyrmas buryn mán-jaidy aityp túsindirdim. Sodan keiin vaktsina alý týraly sheshimge keldik. Eshqandai kúdik, qorqynysh bolǵan joq. Biz buǵan deiin otbasymyzben koronavirýspen aýyryp shyqqanbyz. Kúieýimde jeńil ótti, sebebi ol ekpe alǵan. Balama kelsem, ol stýdent, kópshilik jerde júredi, onyń ústine avtobýsqa minedi. Qoǵamdyq kólikte kóp adam maska taqpai júredi. Sondyqtan da densaýlyq qaýipsizdigi úshin balama vaktsina alýǵa keńes berdim», - deidi jasóspirimniń anasy Baqtygúl Omarbekova.
Aita keteiik, elordaǵa Pfizer ekpesiniń alǵashqy partiiasy 12 qarasha kúni jetkizildi.
