Astanalyq qurylysshylar Jasulan Baiseiitov, Aqylbek Jaqaiymov, Rýslan Berikov jáne Ádilbek Daǵystan órtke oranǵan páterden áiel men úsh balany qutqardy, dep habarlaidy QazAqparat.
Órt juma kúni, 2 naýryzda «Nova City» kópqabatty turǵyn úi kesheniniń 7 qabatynan shyqqan. Kórshiles ǵimaratty turǵyzyp jatqan qurylysshylar tómengi páterdiń terezesi arqyly órt shyqqan páterge órmelegen jáne balalar men áieldi bir-birine berý arqyly qutqaryp qalǵan. Keiinirek kelgen órt sóndirýshiler páterden taǵy bir qart ájeidi qutqardy.
«Túski asymyzdy iship, jumys ornymyzǵa bara jatqanbyz. Alǵash qara tútindi baiqaǵanda, mán bergen joqpyz. Qurylys jumystary shyǵar dep oiladyq. Biraq, áieldiń janushyrǵan daýysyn estip, jetinshi qabatqa kóterildik. Esikti buzyp kire almaǵan soń, altynshy qabatqa tústik. Altynshy qabatta áli eshkim turmaidy, sebebi jóndeý jumystary bitpegen. Osylaisha, terezeden úsh bala men bir áieldi túsirdik», - dedi monolitshi Aqylbek Jaqaiymov.
Onyń aitýynsha, balalar shamamen 2, 8 jáne 9 jasta bolǵan. Páterdegi qart ájeidi qurylysshylar terezeden túsirýge júreksingen.
«Tórt adamdy qutqarǵan soń, tútinnen ózimiz de tunshyǵa bastadyq. Ájeidi terezeniń aldyna ákelip, taza aýamen dem alýy úshin kóterip turdyq. Sol sátte órt sóndirýshiler jetip, bárimizdi shyǵardy», - deidi montajdaýshy Jasulan Baiseiitov.
Eske sala ketsek, órt týraly habar 14:19-da órt bailanysy ortalyq beketine kelip túsken. Órt bolǵan jerge 14:20-da 4 negizgi, 3 arnaiy órt kóligi jáne jeke quramnyń 26 qyzmetkeri jiberilgen.
