استانالىق قۇرىلىسشىلار جاسۇلان بايسەيٸتوۆ, اقىلبەك جاقايىموۆ, رۋسلان بەرٸكوۆ جەنە ەدٸلبەك داعىستان ٶرتكە ورانعان پەتەردەن ەيەل مەن ٷش بالانى قۇتقاردى, دەپ حابارلايدى قازاقپارات.
ٶرت جۇما كٷنٸ, 2 ناۋرىزدا «Nova City» كٶپقاباتتى تۇرعىن ٷي كەشەنٸنٸڭ 7 قاباتىنان شىققان. كٶرشٸلەس عيماراتتى تۇرعىزىپ جاتقان قۇرىلىسشىلار تٶمەنگٸ پەتەردٸڭ تەرەزەسٸ ارقىلى ٶرت شىققان پەتەرگە ٶرمەلەگەن جەنە بالالار مەن ەيەلدٸ بٸر-بٸرٸنە بەرۋ ارقىلى قۇتقارىپ قالعان. كەيٸنٸرەك كەلگەن ٶرت سٶندٸرۋشٸلەر پەتەردەن تاعى بٸر قارت ەجەيدٸ قۇتقاردى.
«تٷسكٸ اسىمىزدى ٸشٸپ, جۇمىس ورنىمىزعا بارا جاتقانبىز. العاش قارا تٷتٸندٸ بايقاعاندا, مەن بەرگەن جوقپىز. قۇرىلىس جۇمىستارى شىعار دەپ ويلادىق. بٸراق, ەيەلدٸڭ جانۇشىرعان داۋىسىن ەستٸپ, جەتٸنشٸ قاباتقا كٶتەرٸلدٸك. ەسٸكتٸ بۇزىپ كٸرە الماعان سوڭ, التىنشى قاباتقا تٷستٸك. التىنشى قاباتتا ەلٸ ەشكٸم تۇرمايدى, سەبەبٸ جٶندەۋ جۇمىستارى بٸتپەگەن. وسىلايشا, تەرەزەدەن ٷش بالا مەن بٸر ەيەلدٸ تٷسٸردٸك», - دەدٸ مونوليتشٸ اقىلبەك جاقايىموۆ.
ونىڭ ايتۋىنشا, بالالار شامامەن 2, 8 جەنە 9 جاستا بولعان. پەتەردەگٸ قارت ەجەيدٸ قۇرىلىسشىلار تەرەزەدەن تٷسٸرۋگە جٷرەكسٸنگەن.
«تٶرت ادامدى قۇتقارعان سوڭ, تٷتٸننەن ٶزٸمٸز دە تۇنشىعا باستادىق. ەجەيدٸ تەرەزەنٸڭ الدىنا ەكەلٸپ, تازا اۋامەن دەم الۋى ٷشٸن كٶتەرٸپ تۇردىق. سول سەتتە ٶرت سٶندٸرۋشٸلەر جەتٸپ, بەرٸمٸزدٸ شىعاردى», - دەيدٸ مونتاجداۋشى جاسۇلان بايسەيٸتوۆ.
ەسكە سالا كەتسەك, ٶرت تۋرالى حابار 14:19-دا ٶرت بايلانىسى ورتالىق بەكەتٸنە كەلٸپ تٷسكەن. ٶرت بولعان جەرگە 14:20-دا 4 نەگٸزگٸ, 3 ارنايى ٶرت كٶلٸگٸ جەنە جەكە قۇرامنىڭ 26 قىزمەتكەرٸ جٸبەرٸلگەن.
