Foto: ashyq derekkóz
Astanada alaiaqtyq faktisi boiynsha erli-zaiypty Totaqanovtar qylmystyq jaýapkershilikke tartylýda, dep habarlaidy Ult.kz.
Olarǵa 2020 jyldan 2024 jylǵa deiin Instagram jelisi arqyly jurtty aldap, «ólim aýzynda jatqan balasyna» emge qajet dep qarjy jinaǵan degen aiyp taǵylyp otyr.
Aýdanaralyq qylmystyq ister jónindegi sottyń málimetinshe, erli-zaiypty jurtshylyqtyń janashyrlyǵyn paidalanyp, qaiyrymdylyqqa úndeý jariialaǵan. Nátijesinde olardan 1 milliard teńgeden astam qarajat jinalǵan. Alaida jinalǵan qarjy balanyń emine emes, býkmekerlik stavkalarǵa, sándi kiimderge, sheteldik saparlarǵa jáne jeke qajettilikterge jumsalǵan.
Qarajat tek Totaqanovanyń atyna ǵana emes, onyń anasy men 2021 jyly qaitys bolǵan, zańdy túrde áreketke qabiletsiz dep tanylǵan ájesiniń atyna aýdarylǵany anyqtaldy.
Qazirgi ýaqytta bul iske qatysty tergeý amaldary jalǵasyp jatyr.
