Foto:Astana ákimdiginiń resmi saity
Astanalyq dárigerler ólim aýzynda jatyp bosanǵan áieldi aman alyp qaldy.
№2 kópbeiindi qalalyq aýrýhananyń dárigerleri pankreatitpen aýyratyn júkti áieldi aman alyp qaldy. Bul pankreatittiń aýyr asqynǵan túri kóp jaǵdaida naýqasty ólim jaǵdaiyna aparýy múmkin.
Júktiliktiń 39-aptasynda kelinshektiń boiynda pankreonekroz órshigen, bul - jedel pankreatittiń ómirge qaýip tóndiretin asqynǵan túri, uiqy bezi tininiń ólgenin bildiredi. Basym kópshiliginde dene múshesiniń jetkiliksiz damýyna, qannyń ýlanýyna jáne naýqastyń ólimine ákeledi.
Naýqas áieldi ishiniń joǵarǵy bóligi qatty shanshyp aýyryp, júrek ainý, qusý belgileri mazalaǵan. Ol shuǵyl túrde jansaqtaý bólimine jatqyzylǵan. Ana men boiyna bitken sábi ómirine qaýip tóngenine bailanysty jansaqtaý bólimindegi akýsher-ginekologtar brigadasy jedel bosandyrý týraly sheshim qabyldaǵan.
Bosanǵannan keiin kelinshektiń jaǵdaiy aýyr bolady. Aýrýhananyń bas dárigeri Nurbol Tursynbaev áriptesterimen birlese diagnostika júrgizip, klinikalyq jaǵdaidyń kúrdeliligine qaramastan, hirýrgiialyq aralasýsyz emdeý týraly sheshim qabyldaidy.
"Júrgizilip jatqan em aiasynda jaǵdaidy turaqtandyryp, áieldi jalpy hirýrgiia bólimshesine aýystyrýǵa múmkindik týdy. Baqytymyzǵa orai, operatsiia qajet bolmady, kóp uzamai áieldiń jaǵdaiy ońaldy", - deidi emdeýshi dáriger Aidar Jumaǵaliev.
Qazir ana men bala ózderin jaqsy sezinedi jáne aýrýhanadan shyǵýǵa daiyndalyp jatyr.
