Elorda ákimdigi Astanaǵa aqyly kirý jobasyn qarastyryp jatyr.
Aqyly kirýdi tek tańǵy jumysqa barar ýaqytta uiymdastyrý josparlanýda, basqa ýaqytta kóliktiń kez kelgen túri úshin jol júrý tolyǵymen tegin bolady, dep habarlaidy Elorda Info.
Qalanyń jol jelisine júktemeni tómendetý maqsatynda qalaǵa aqyly kirý jobasy pysyqtalý ústinde. Bul týraly qalalyq máslihattyń kezekti sessiiasynda Astana ákiminiń birinshi orynbasary Sergei Horoshýn habarlady.
"Júrgizilgen zertteýler men Astanaǵa keletin kóliktiń keshendi taldaýy kórsetkendei, tańǵy 7 men 9 aralyǵynda kólik sanatyna bailanysty kirýdiń aqyly túrin engizý kólik quraldary qozǵalysy aǵynynyń ortasha jyldamdyǵyn 15-20 protsentke arttyrýǵa múmkindik beredi. Atalǵan jobany júzege asyrý MJÁ aiasynda josparlanǵan", — dep túsindirdi ákimniń birinshi orynbasary.
Onyń aitýynsha, aqyly kirýdi tek tańǵy jumysqa barý ýaqytynda uiymdastyrý josparlanýda, basqa ýaqytta kóliktiń kez kelgen túri úshin jol júrý tolyǵymen tegin bolady.
Búgingi tańda, Sergei Horoshýnniń sózinshe, qalaǵa kún saiyn alty magistral (Astana-Qaraǵandy, Astana-Qostanai, Astana-Pavlodar, Astana-Qosshy, Astana-Qorǵaljyn, Astana-Kókshetaý) boiynsha orta eseppen 82 000 kólik quraly kelip-ketedi eken.
