Kórneki foto: Akorda.kz
Ishki ister ministri Erjan Sádenov Astana máslihaty depýtatynyń elordaǵa kirer joldarǵa blokpost qoiý týraly usynysyna jaýap berdi, dep habarlaidy Sputnik Qazaqstan.
Ministr azamattar qazir erkin júrip-turatynyn, sondyqtan Astanaǵa kirýdi shekteý – qajetsiz dúnie ekenin atap ótti.
"Bizdiń qalaǵa kiretinderdi jedel baqylap turýǵa qaýqarymyz jetedi. Zańbuzýshylar týraly da aqparat alamyz, bul úshin kúshimiz ben quraldarymyz bar. Sol sebepti blokbeketterge qajettilik joq. Buǵan deiin ornatylǵan blokpostardy biz alyp tastadyq, qazir negizgi joldarda ǵana qaldy. Al qalany jabýdyń mánin kórip turǵan joqpyn", - dedi Sádenov májilis kýlýarynda.
Buǵan deiin elordalyq máslihattyń depýtaty Azamat Aithojin Astanaǵa sapasyz ónim kirgizbeý jáne kóshi-qondy tejeý úshin kireberiste blokbeket qoiýdy usynǵan bolatyn.
