Foto: Azattyq
"QazMunaiGaz" kompaniiasynyń basshysy Maǵzum Myrzaǵaliev Astanaǵa kelgen jańaózendik munaishylardyń máselesi qalai sheshilip jatqanyn aitty, dep habarlaidy Sputnik Qazaqstan tilshisi.
Onyń sózinshe, tenderdi utqan kompaniia utylǵan "Ber Áli" kompaniiasynyń qyzmetkerlerin jumysqa alýǵa daiyn ekenin aitqan. Alaida munaishylar odan bas tartqan. Olar bir jyldyq emes, úsh jyldyq kelisimshart bekitýdi talap etip otyr.
"Biylǵa deiin kelisimshart tek bir jyldyq qana boldy. Qazir biz úsh jyldyq kelisimshartqa aýysý týraly sheshim qabyldadyq. Degenmen bir jyldyq nemese úsh jyldyq kelisimshart tek QazMunaiGazdyń ustanymy emes qoi. Nege deseńizder, jekemenshik kompaniialar aitady: bizdiń táýekelimiz bar, erteń biz úsh jyldyq kelisimshartqa qol qoisaq, biraq infliatsiia ósip, jumysshylardyń jalaqysy artsa, tehnologiia nemese qural-jabdyqtardyń baǵasy ósip ketse, onda biz úsh jyl qaitip jumys isteimiz?" Sol sebepti ár kompaniia úsh jyldyq kelisimshartqa otyrýǵa daiyn ba, joq pa, ózderi sheshýi kerek", - deidi Myrzaǵaliev.
Aitýynsha, QazMunaiGaz tarapy buǵan daiyn. "Samuryq-Qazyna" satyp alý protsedýrasyna tiisti ózgeristerdi engizedi.
"Jasyratyny joq, jumysshylardyń talaptary jii ózgere beredi. Jekemenshik kompaniialar olardy jumysqa alýǵa daiyn ekenin bildirdi. Keiin jumysshylardyń talaby ózgerip ketti. Jekemenshikke emes, bizdi "Ózenmunaigazdyń" ózine jumysqa turǵyzyńdar dep talap qoidy. Bul óte orynsyz jáne oryndalmaityn talap", - deidi QazMunaiGaz basshysy.
Sebebi, onyń aitýynsha, ÓzenMunaiGazǵa jumysqa turýǵa 9 myńnan astam turǵyn kezekte tur. Myrzaǵaliev kelissózge qalǵan jańaózendik jumysshylar áli Astanada ekenin atap ótti.
"Jigitter áli kúnge deiin Astanada. Tiisti kelissózder júrip jatyr. Eger bizdiń kelissózder konstrýktivti ótse, sheshimi tabylady dep oilaimyn. Bári retteledi degen úmitimiz bar", - dedi ol.
Sondai-aq ol jekemenshik kompaniialarǵa jańaózendik munaishylarǵa qandai jalaqy usynyp otyrǵanyn aitty.
"Jalaqyny jekemenshik kompaniialar usynyp jatyr. Olardyń ortasha jalaqysy aiyna 740-760 myń teńge. Vahtalary on bes kúndik nemese bir aptalyq qoi. Sonda aiyna 750 myń teńge jalaqy túsedi", - deidi Myrzaǵaliev.
